ತಾಪವ ಬಿಡಿಸು ದಯಾಪರ ankita prasanna

 ರಾಗ -  :  ತಾಳ - 

ತಾಪವ ಬಿಡಿಸು ದಯಾಪರ ಶ್ರೀ

ಗೋಪಾಲಕೃಷ್ಣ ನೀ ಕಾಪಾಡು ಸಂಸಾರ ll ಪ ll

ಲೋಕನಾಯಕ ನಿನ್ನ ಕರುಣವಂದಿದ್ದರೆ

ಸಾಕೆಂದೆ ಜ್ಞಾನಾನಂದಕರ

ಪಾಕಶಾಸನ ಸುತಗೊಲಿದಾತನ ಭಂಡಿ

ನೂಕಿ ನಡೆಸಿದ ಕೃಪಾಕರ ಮೂರುತಿ ll 1 ll

ನಡೆವುದು ನುಡಿವುದು ಕೊಡುವುದು ಕೊಂಬುದು

ಮಡದಿ ಮಂದಿರ ಮಮತಾಸ್ಪದದ

ಒಡವೆ ವಸ್ತುವು ಮೊದಲಾದುದೆಲ್ಲವನು ಶ್ರೀ-

ಮುಡಿಯ ಸಂವರಿಸುವ ಕರದಿ ಸಂಗ್ರಹಿಸುತ ll 2 ll

ನಿನ್ನಡಿಗಳ ನಂಬಿ ನಿಂದಿಹೆನಿಲ್ಲಿ ಪ್ರ-

ಸನ್ನ ಮುಖಾಂಬುಜ ಪಾಲಿಸೆಂದು

ಅನ್ಯರಿಗೆಂದೆಂದು ದೈನ್ಯ ತೋರಿಸಲಾರೆ

ಪನ್ನಗಾಚಲವಾಸ ಪರಮ ದಯಾಳೊ ll 3 ll

***