ಬಾರೆ ಪಾರ್ವತಿ ಸಾರೆ ಸುಖವ ತೋರೆ ನಿನ ದಯವ ankita kamalanabha vittala

 ..

kruti by Nidaguruki Jeevubai

ಬಾರೆ ಪಾರ್ವತಿ ಸಾರೆ ಸುಖವ

ತೋರೆ ನಿನ ದಯವ ಪ

ಬಾರಿ ಬಾರಿಗು ಪ್ರಾರ್ಥಿಸುವೆನೆ

ಸಾರಸಾಕ್ಷಿಯೆ ಸರ್ಪವೇಣಿಯೆ ಅ.ಪ

ದಕ್ಷಕುವರಿಯೆ ಈಕ್ಷಿಸೆನ್ನನು-

ಪೇಕ್ಷೆ ಮಾಡದಲೆ

ಅಕ್ಷಿತ್ರಯನ ಸತಿಯೆ ಭಕ್ತರ

ಕಷ್ಟ ಬಡಿಸುತಲಿ

ಸೂಕ್ಷ್ಮ ಮತಿಯನಿತ್ತು ಕೃಷ್ಣನ

ಸ್ತೋತ್ರಗಾನದಲಿ ಅ-

ಪೇಕ್ಷೆಯೊದಗುವ ಮನವ ಪಾಲಿಸು

ರಕ್ಷಿಸೀಗಲೆ ಭಕ್ತವತ್ಸಲೆ 1

ಮಂದಗಮನೆ ಮತ್ತೊಂದು ಪೇಳುವೆ

ನಂದಿವಾಹನನಾ

ಮುಂದೆ ಸ್ತುತಿಪ ಭಕ್ತವೃಂದ ವಿ-

ದೆಂದು ಪೇಳಿದೆ ನಾ

ಸುಂದರ ಶ್ರೀ ಹರಿಯ ಸೇವೆಗೆ

ಪೊಂದಿಸೆನ್ನ ಮನ

ಚಂದದಿಂದ ಪ್ರಾರ್ಥಿಸುವೆನೆ

ಸುಂದರಾಂಗಿಯೆ ನಿನ್ನನನುದಿನ 2

ಕಮಲನೇತ್ರೆಯೆ ವಿಮಲ ಸದ್ಗುಣಗುಣಿಯೆ ಪಾರ್ವತಿ

ಕಮಲಸಂಭವ ಭವಸುರಾರ್ಚಿತನ

ಸ್ಮರಿಸುವ ಮತಿ ಹೃ-

ತ್ಕಮಲದೊಳಗೆ ನಿಲಿಸುವಂತೆ

ಮಾಡು ಸದ್ಗತಿ

ಕಮಲನಾಭ ವಿಠ್ಠಲ ಕೊಡುವ

ನೆನುತ ಕೀರುತಿ 3

***