ಶ್ರೀ ರಾಯರ ಕಾರುಣ್ಯವನ್ನು ಅತ್ಯಂತ ಮನೋಜ್ಞವಾಗಿ ವರ್ಣಿಸಿದ್ದಾರೆ.
ರಾಗ : ಮೋಹನ ತಾಳ : ಝಂಪೆ
ನೋಡಲೇ ಮನವೇ
ಕೊಂಡಾಡು ಗುರುಗಳ ಪಾದ ।
ಈಡುಯಿಲ್ಲವೋ ಪುಣ್ಯಕೆ ।। ಪಲ್ಲವಿ ।।
ನಾಡೊಳಗೆ ಗುರು
ರಾಘವೇಂದ್ರರಾಯರ ಸೇವೆ ।
ಮಾಡಿದವ ಪರಮ
ಧನ್ಯ । ಮಾನ್ಯ ।। ಅ. ಪ ।।
ನಿಷ್ಠೆಯಿಂದಲಿ ಸ್ಮರಿಸೆ
ಕಷ್ಟಗಳು ದೂರ । ಮನೋ ।
ಭೀಷ್ಟಗಳ ಪೂರೈಸುವರೋ ।
ಅಷ್ಟ ಸೌಭಾಗ್ಯವನೆ
ಕೊಟ್ಟು ಸುಜನರಿಗೆ । ಶ್ರೀ ।
ವಿಷ್ಣು ದಾಸ್ಯವ
ತೋರ್ಪರೋ ।।
ದೃಷ್ಠಿಯಿಂದಲಿ
ನೋಡಲನೇಕ ಜನ್ಮದ ಪಾಪ ।
ಬಿಟ್ಟು ಪೋಪವೋ ಕ್ಷಣದಲಿ ।
ಎಷ್ಟು ಹೇಳಲಿ ಇವರ
ನಿಷ್ಠ ಮಹಾತ್ಮ್ಯೇಯನು ।
ದುಷ್ಟರಿಗೆ ದೊರೆಯದಿವರ
ಸೇವಾ ।। ಚರಣ ।।
ಹಲವು ಕ್ಷೇತ್ರಗಳೇಕೆ
ಹಲವು ತೀರ್ಥಗಳೇಕೆ ।
ಫಲ ಸುಲಭದಲ್ಲಿರಲು ।
ಬಲವು ಇದ್ದದ್ದರೊಳು
ಪ್ರದಕ್ಷಿಣೆ ಸುಪದಜಲ ।
ತಲೆಯಲ್ಲಿ ಧರಿಸಿ ನಿತ್ಯ ।।
ಮಲ ರಹಿತನು ಆಗಿ
ದಂಡ ಪ್ರಣಾಮವ ಮಾಡೆ ।
ಒಲಿವರು ಕರುಣದಲಿ ಬೇಗ ।
ಜಲಜನಾಭನು ನಾಲ್ಕು
ರೂಪದಿಂದಿವರಲ್ಲಿ ।
ಸಿಲುಕಿ ಪೂಜೆಗೊಂಬ
ಸತತಾ । ಮೋಕ್ಷದಾತಾ ।। ಚರಣ ।।
ಹರಿದಾಸರಿದ್ದ ಸ್ಥಳ ವರ
ಕಾಶಿ ಮೊದಲಾದ ।
ಕುರುಕ್ಷೇತ್ರಕಿಂತಧಿಕವೋ ।
ಸುರ ಋಷಿ ಮುನಿಗಳು
ಇಲ್ಲಿಹರು ವೈಕುಂಠ ।
ಸರಿಮಿಗಿಲು ಎಂದೆನಿಪುದೋ ।।
ಪರಮ ಸುಜ್ಞಾನಿಗಳಗೀ
ಫಲವು ದೊರಕುವುದು ।
ತರತಮದಿ ಇತರ ಜನಕೆ ।
ಗುರು ಶ್ರೀಶವಿಠ್ಠಲನು
ಇವರ ರೂಪ ನಾಮದಲಿ ।
ಪರಿಪರಿಯ ವರವಗರೆವಾ ।
ಪೊರೆವಾ ।। ಚರಣ ।।
****
