ಮೂರುತಿ ಪುಟ್ಟ ಮೂರುತಿ ಪ.
ಕೀರುತಿ ಬಲು ಬಲು ವಾರುತಿ ಲೋಕರೊಳ್
ಸಾರುತಿ ಹರಿಗುಣ ಬೀರುತಿ ತ್ರಿಜಗದಿ ಅ.ಪ.
ತ್ರೇತೆಯ ಯುಗದಲಿ ಜನಿಸಿ | ರಾಮ
ದೂತಕಾರ್ಯಕೆ ಮನವಿರಿಸಿ
ಪ್ರೀತಿಯೊಳ್ ರವಿಜನ ಉಳಿಸಿ | ಬಹು
ಖ್ಯಾತಿಯ ವಾಲಿಯನಲ್ಲೇ ಅಳಿಸಿ
ವಾತವೇಗದಿ ವನಧಿಯ ದಾಟಿ ಉಂಗುರ
ಸೀತೆಗಿತ್ತು ಲಂಕೆ ವೀತಿಹೋತ್ರನಿಗಿತ್ತ 1
ದ್ವಾರಕಿನಿಲಯನ ಒಲಿಸಿ | ಬಲು
ಧೀರ ಭೀಮಸೇನನೆನಿಸಿ
ಸೋಮಕುಲದಲಿ ಜನಿಸಿ | ಬಲು
ಕಾಮಿ ಕೀಚಕನನ್ನು ವರೆಸಿ
ಕಾಮಿನಿಗೋಸುಗ ಕಾಮುಕ ಕುರುಕುಲ
ಧೂಮವೆಬ್ಬಿಸಿದ ನಿಸ್ಸೀಮ ಸುಗುಣಧಾಮ 2
ಪುಟ್ಟಯತಿಯ ರೂಪತಾಳಿ | ಬಲು
ಗಟ್ಟಿ ಗೋಪೀ ಗೆಡ್ಡೆ ಸೀಳಿ
ಪುಟ್ಟ ಕೃಷ್ಣನ ಕಂಡು ತೋಳಿ | ನಿಂದ
ನಿಷ್ಟೆಯೊಳ್ ನೆತ್ತಿಯೊಳ್ ತಾಳಿ
ಇಟ್ಟು ಉಡುಪಿಯಲ್ಲಿ ಅಷ್ಟಯತಿಗಳ ನಿಲಿಸಿ
ಕುಟ್ಟಿ ಕುಮತಗಳ ವೈಷ್ಣವಾಗ್ರಣಿಯಾದ 3
ಸಾಕಾಯಿತೇ ಸ್ವಾಮಿಕಾರ್ಯ | ಇಲ್ಲಿ
ಬೇಕಾಯಿತೇ ಮೌನಚರ್ಯಾ
ಆ ಕಾಲದ ಎಲ್ಲ ಶೌರ್ಯ ಉಡುಗಿ
ಏಕಾಂತದಲಿ ಹರಿಚರ್ಯಾ
ನೀ ಕಂಡು ಮನದಲ್ಲಿ ವಾಕು ಉಚ್ಚರಿಸದೆ
ಈ ಕುಧರಜೆ ತೀರ ಏಕಾಂತವಾಸನೆ 4
ಅಪಾರಮಹಿಮನೆ ಹಂಪೆ | ಯಲ್ಲಿ
ಈ ಪರಿ ಇರುವುದು ತಂಪೆ
ಶ್ರೀ ಪತಿ ಪದಕಂಜ ಕಂಪೆ | ಇಲ್ಲಿ
ನೀ ಪಾರಣೆಯೆ ಮಾಳ್ಪ ಸೊಂಪೆ
ಗೋಪಾಲಕೃಷ್ಣವಿಠ್ಠಲದಾಸ ನಿನ್ನಲ್ಲಿ
ಸ್ಥಾಪಿಸಿದರೆ ವ್ಯಾಸರೀಪರಿ ಯಂತ್ರದಿ 5
****
