ಪಾಲಿಸು ಪರಮಾತ್ಮನೆ ಪಾವನ ಗುಣಶೀಲ ಸದ್ಗುಣಧಾಮನೆ ankita kamalanabha vittala

 ..

kruti by Nidaguruki Jeevubai

ಪಾಲಿಸು ಪರಮಾತ್ಮನೆ ಪಾವನ ಗುಣ-

ಶೀಲ ಸದ್ಗುಣಧಾಮನೆ ಪ

ಶ್ರೀಲಕುಮಿಯ ಪ್ರಿಯ ಶ್ರೀಶಸರ್ವೋತ್ತಮ

ವಾಸವವಂದಿತ ವಾಸುದೇವನೆ ಹರಿ ಅ.ಪ

ಕೇಶವ ನಾರಾಯಣ ಮಾಧವ

ಗೋವಿಂದ ವಿಷ್ಣುವೆ ನಮಿಪೆ

ಮಧುಸೂದನ ತ್ರಿವಿಕ್ರಮ ವಾಮನ

ಶ್ರೀಧರ ಹೃಷಿಕೇಶ ಪದ್ಮನಾಭನೆ ಪೊರೆ

ದಾರಿ ಕಾಣೆ ದಾಮೋದರ ಸಂ_

ಕರ್ಷಣ ವಾಸುದೇವ ಪ್ರದ್ಯುಮ್ನನನಿ-

ರುದ್ಧ ಪುರುಷೋತ್ತಮ ಅಧೋಕ್ಷಜ

ನಾರಾಸಿಂಹ ಅಚ್ಚುತ ಜನಾರ್ದನ ಉ-

ಪೇಂದ್ರ ಹರಿ ಶ್ರೀ ಕೃಷ್ಣ ಶೌರಿ1

ವಾರಿ ವಿಹಾರದಲಿ ಬೆನ್ನಿಲಿ ಗಿರಿ

ಭಾರವನ್ನೆ ತಾಳಿ

ಕೋರೆ ತೋರುತ ಕರುಳ್ಹಾರವ ಮಾಡಿದ

ಮೂರಡಿ ಭೂಮಿಯ ಬೇಡಿ ಭೂಪಾಲನ

ಕಾಡಿ ಕೆಡಹುತ ಕೂಡಿ ಕಪಿಗಳ

ಬೇಡಿ ಪಾಲ್ಮೊಸರ್ಬೆಣ್ಣೆ ಬುದ್ಧನೀ-

ನಾಗಿ ಖಡ್ಗವಧರಿಸಿ ಕುದುರೆಯ-

ನೇರಿ ಮೆರೆಯುವ ಶ್ರೀ ರಮಾಪತೆ 2

ಶಾಂತೀಶ ಅನಿರುದ್ಧನೆ ಶರಣೆಂಬೆ ನಿನ್ನ

ಕೃತಿಪತಿ ಪ್ರದ್ಯುಮ್ನನೆ ಜಗದೀಶ ಜಯಾಪತಿ

ಜಯ ಸಂಕರ್ಷಣ ದೇವ

ನಮಿಪೆ ಮಾಯಾಪತಿ ವಾಸುದೇವನೆ ನಿನ್ನ

ಚರಣ ಪಂಕಜ ತೋರು ಲಕ್ಷ್ಮೀ-

ರಮಣ ನಾರಾಯಣ ನಮೋ

ಗರಡು ಗಮನನೆ ಕಮಲನಾಭ ವಿ-

ಠ್ಠಲನೆ ಶ್ರೀಹರಿ ಪರಮ ಕರುಣಿಯೆ 3

***