ಹಾಲಹಲ ಉಂಡ ನಮ್ಮ ಪಾರ್ವತಿಯ ಗಂಡ ankita gopalakrishna vittala

ಹಾಲಹಲ ಉಂಡ ನಮ್ಮ ಪಾರ್ವತಿಯ ಗಂಡ ||pa||

ನೀಲಕಂಠನೆಂದೆನಿಸುತ ಸುರರನು ಪಾಲಿಸಿದನು ಕಂಡ್ಯಾ ||a.pa||

ಸುರರು ಅಸುರರು ಕೂಡಿ ಶರಧಿಯ
ಭರದಿ ಮಥನವ ಮಾಡಿ
ಗರಳವು ಉದ್ಭವಿಸಲು ಕಂಗೆಡುತಲಿ
ಹರನನು ಸ್ತುತಿಮಾಡಿ ||1||

ಮೃತ್ಯುಂಜಯ ಪಾಹಿ | ಸಲಹೊ
ಕೃತ್ತಿ ವಾಸನೆ ಪಾಹಿ
ಮೃತ್ಯುವಾದ ವಿಷ ಭಯವನೆ ಬಿಡಿಸೈ
ಸತ್ಯವಿಕ್ರಮ ಪಾಹಿ ||2||

ಪರಿಪರಿ ಸ್ತುತಿಗೈಯೆ | ಹರಮನ
ಕರಗುತ ಕೃಪೆ ಗೈಯೆ
ಗಿರಿಜೆ ನೀಡು ಅಪ್ಪಣೆ ವಿಷ ಕುಡಿವೆನು
ಪರಮ ಮಂಗಳ ಕಾಯೆ ||3||

ತನುಸುಖವ ತೊರೆದು | ಲೋಕವ
ಸನುಮತದಲಿ ಕಾಯ್ದು
ಘನಕೀರ್ತಿಯನು ಪಡೆಯಲು ಹರಿ ಮೆಚ್ಚುವ
ಎನುತ ಗಿರಿಜೆಗೆ ಪೇಳ್ದು ||4||

ಕರದಿ ಸೆಳೆದು ಕುಡಿದ | ವಿಷವನು
ಭರದಲಿ ವಿಧಿ ಕಂದ
ಉರಕಿಳಿಯದೆ ನಿಂತಿತು ತಾ ಕಂಠದಿ ಶ್ರೀ
ಹರಿಯ ಕೃಪೆಯಿಂದ ||5||

ಜಗವ ದಹಿಪ ಕಾಳಕೂಟವ
ನಗಜೇಶನು ಕೇಳ
ಬಿಗಿದು ಕಂಠದಿ ನಿಲ್ಲಿಸಿ ಲೋಕವ
ಪೊರೆದನು ಉರಿಫಾಲ ||6||

ಪೋಯ್ತು ಕಾಳರಾತ್ರಿ | ಮಂಗಳ
ಆಯಿತು ಶಿವರಾತ್ರಿ
ಶ್ರೀಯರಸ ಗೋಪಾಲಕೃಷ್ಣ
ವಿಠ್ಠಲನ ಪ್ರೀತಿ ಪಾತ್ರ ||7||
*******