ಶ್ರೀರಾಮನಾಮವ ನುಡಿ ಮನವೆ ಸೋಮ ಮೌಳಿ ಸತಿಗೆ ankita others SRI RAAMA NAAMAVA NUDI MANAVE SOMA MOULI SATIGE

15 ದಶಕಗಳಷ್ಟು ಪ್ರಾಚೀನ , ಕೆಳದಿ ಪ್ರಾಂತ್ಯದ ಸಂಪ್ರದಾಯದ ಕೃತಿ- ಸಂಕ್ಷೇಪ ರಾಮಾಯಣ 

ಶ್ರೀ ರಾಮನಾಮವ ನುಡಿ ಮನವೆ| ||ಪ||

ಸೋಮ ಮೌಳಿ ಸತಿಗೆ ಪೇಳ್ದ ರಾಮ 

ರಾಮ ರಾಮ ಎಂಬುವ||ಅ.ಪ||

ದೇವದೇವನಾಗಿ ಮಹಿಗೆ|

ಸೇವಿಸುವರ ಪೊರೆಯುವುದಕೆ|

ಭೂವರಂಗೆ ದಶರಥಂಗೆ| 

ಕುವರನೆನಿಸಿ ಮುದವನಿತ್ತ ||೧||

ಮೌನಿವರ‍್ಯಗಾದಿ ಸುತನ|

ಮುಖವ ಪೊರೆದು ದೈತ್ಯ ದಮನ|

ನೆನಿಸಿ ನಡೆಯಲಾಗ ಚರಣ|

ರಜದಿ ಶಿಲೆಯ ಪೆಣ್ಣಗೈದ||೨||

ಜನಕರಾಜಪುರಕೆ ನಡೆದು|

ಘನಮಹೇಶ ಧನುವ ಮುರಿದು|

ಜನಕಸುತೆಯ ಕರವ ಪಿಡಿದು|

ಮುನಿ ಪರಶುರಾಮನ ಗೆಲ್ದ ||೩||

ಜನಕನಾಜ್ಞೆಯಿಂದ ಸಾರಿ|

ವನಕೆ ಸೀತೆಯೊಡನೆ ಸೇರಿ|

ವಿನಯ ಸಂಪದವನ್ನೆ ತೋರಿ|

ಮುನಿಜನಂಗಳ ಪೊರೆದ ಪಾವನ ||೪||

ಗೋತ್ರದೊಳು ಪವಿತ್ರನೆಂದು|

ಸ್ತೋತ್ರಪಾತ್ರನಾಗಿ ಬಂದು|

ಚಿತ್ರಕೂಟದೊಳು ನಿಂದು|

ಭ್ರಾತೃಗಿತ್ತ ಪಾದುಕೆಯನು ||೫||

ಪಂಚವಟಿಯ ಸೇರಿ ಸುಖಿಯ|

ವಂಚಿಸಿದಳಾ ಕಾಮಮುಖಿಯ|

ಪೊಂಚ ದಂಡಿಸಿ ಶೂರ್ಪನಖಿಯ|

ಕಾಂಚನಾಂಗ ಮೃಗವ ಮೆಟ್ಟಿದ ||೬||

ನೀಲವೇಣಿ ಹರಣದಿಂದ|

ಗೋಳಿಡಲಾಜಟಾಯುವಿಂದ|

ಕೇಳಲಾಗ ಕಥೆಯ ಬಂದ|

ವಾಲಿಪುರಕೆ ವೀರನಾ ರಘು ||೭||

ಮಾಡಿ ವಾಲಿಯ ವಧೆಯ ಬೇಗ|

ಕೂಡಿದಾ ಸುಗ್ರೀವನಾಗ|

ರೂಢಿಸುತ್ತ ಕಪಿಗಳಾಗ|

ನೋಡಿ ವಾಯುಸುತನ ಮೆಚ್ಚಿದ ||೮||

ದಾಸಗಾಂಜನೇಯಗರುಹಿ|

ಭೂಸುತೆಯ ಬಳಿಗೆ ಕಳುಹಿ|

ಆ ಸಮುದ್ರವನೆ ನೆನಹಿ|

 ಘಾಸಿಯಿಲ್ದೆ ಲಂಕೆಗೈದ ||೯||

ರಾವಣಾದಿಗಳನು ಸಂಹರಿಸಿ|

ಆ ವಿಭೀಷಣನಿಗೆ ಹರಸಿ|

ಪಾವನೇಯ ಸ್ವೀಕರಿಸಿ|

ಭಾವಿಸಿದನು ಭರತಭಕ್ತಿಯ ||೧೦||

ಕಿಂಕರಾಳಿಗಿತ್ತು ವರವ|

ಬಿಂಕದಿಂದ ಸಾರಿಪುರವ|

ಪಂಕಜಾಕ್ಷಿಯೊಡನೆ ಮೆರೆವೊ|

ವೆಂಕಟಾರ್ಯ ಬಿಡದೆ ಪಾಡುವ ||೧೧||

***