ನಾಮವನೊದಗಿಸಯ್ಯ ಶ್ರೀಹರಿ ನಿನ್ನ |ನಾಮವನೊದಗಿಸಯ್ಯ ಪ
ನಾಮವನೊದಗಿಸಯ್ಯ ನಾನೆಂಬ ಕರ್ತೃತ್ವ ಬಿಡಿಸಿ |ಸಾಮಜಪೋಷಕ ನಿನ್ನ ಪಾದಸರಸಿಜಗಳಿಗೆರಗುವೆ ಅ.ಪ
ಮಾತನಾಡುವಾಗ ಮಲಗುವಾಗ ನಡೆಯುವಾಗ |ಭೀತಿಗೊಂಡಾಗ ಎಡಹಿಬೀಳುವಾಗ |ಸೀತಾರಾಮ ಗೋವಿಂದ ಶ್ರೀ ವೈಕುಂಠಾಧೀಶ ಅ-|ನಾಥ ಬಾಂಧವ, ಕೃಷ್ಣಾ, ಕೃಷ್ಣಾ ಎಂದು ಕರೆವ 1
ತನು ತಾಳದಂಥಕ್ಷುಧೆದಾಹವಿಕಾರಗ-|ಳನುಭವಿಸುತ ಕಂಗೆಡುವಂಥ ಸಮಯದಲ್ಲಿ ||ವನಜನಾಭಗೋವಿಂದ, ವಾಣೀಪತಿಪಿತ ಕೃಷ್ಣ |ದನುಜಮರ್ದನ ಭಕ್ತ ವತ್ಸಲನೆಂದು ಕರೆವ2
ಆಸಹ್ಯವಾದಜರೆರೋಗಂಗಳಾವರಿಸಿ |ಅಸುಗಳು ಕಂಠಗತವಾಗಿ ಧೃತಿತಪ್ಪಿ ||ವಿಷಮದೂತನ ಕೈವಶವಪ್ಪ ಸಮಯದಲ್ಲಿ |ಬಿಸಜಾಕ್ಷ ಪುರಂದರವಿಠಲನೆಂದು ಕರೆವ 3
****
