ರಾಗ: [ಭೈರವಿ] ತಾಳ: [ಆದಿ]
ನೋಡಿದೆ ನಾನೀಗ ಗುರುರಾಜನ ಬೇಗ ಪ
ನೋಡಿ ಕೊಂಡಾಡಿ ಪಾಡಿ ಬೇಡುವೆನೀಗ ಅ.ಪ
ಕರದೊಳು ದಂಡ ಕಮಂಡಲು ಪಿಡಿದಿಹ
ಕೊರಳೊಳು ತುಳಸಿ ಹಾರವ ಧರಿಸಿಹ
ನರರ ಸೇವೆಯಕೊಳ್ವ ನರಹರಿಪ್ರೀಯನ
ಕರುಣಾಸಾಗರ ನಮ್ಮ ಗುರು ರಾಘವೇಂದ್ರನ 1
ಕಲಿಕಲ್ಮಷದೂರ ಕುಜನಕುಠಾರನ
ಸುಲಲಿತ ಕರುಣಾಬ್ಧಿ ಬುಧಜನವಂದ್ಯನ
ಒಲಿದು ಭಕ್ತರ ಕಾಯ್ವ ಕಾರುಣ್ಯಶೀಲನ
ಜಲಜನಾಭನ ಪಾದ ಭಜಿಪ ಗುರುರಾಜನ 2
ಕಾಮಿತಗಳನೀವ ವರಕಾಮಧೇನುವೆ
ನೇಮದಿಂಭಜಿಪರ್ಗೆ ಚಿಂತಾಮಣಿಯೆನಿಪನ
ಕೋಮಲಾಂಗ ಸಿರಿಕೃಷ್ಣವಿಠಲನಪಾದ
ಪ್ರೆಮದಿಂಪೂಜಿಪ ಗುರು ರಾಘವೇಂದ್ರರ 3
***
