ರಾಗ - : ತಾಳ -
ನರನಾದ ಮೇಲೆ
ಹರಿ ನಾಮ ಜಿಹ್ವೆಯೊಳಿರಬೇಕು ll ಪ ll
ಭೂತ ದಯಾಪರನಾಗಿರ ಬೇಕು
ಪಾತಕವೆಲ್ಲವ ಕಳೆಯಲು ಬೇಕು
ಮಾತು ಮಾತಿಗೆ ಹರಿಯೆನ್ನ ಬೇಕು ll 1 ll
ಆರು ವರ್ಗವನಳಿಯಲು ಬೇಕು
ಮೂರು ಗುಣಂಗಳ ಮೀರಲು ಬೇಕು
ಸೇರಿ ಬ್ರಹ್ಮನೊಳಿರಬೇಕು ll 2 ll
ಅಷ್ಟ ಮದಂಗಳ ತುಳಿಯಲು ಬೇಕು
ದುಷ್ಟರ ಸಂಗವ ಬಿಡಲು ಬೇಕು
ಕೃಷ್ಣ ಕೇಶವ ಎನ್ನಬೇಕು ll 3 ll
ವೇದ ಶಾಸ್ತ್ರವನೋದಲು ಬೇಕು
ಭೇದಹಂಕಾರವ ನೀಗಲು ಬೇಕು
ಮಾಧವ ಸ್ಮರಣೆಯೊಳಿರಬೇಕು ll 4 ll
ಶಾಂತಿ ಕ್ಷಮೆ ದಮೆ ಪಿಡಿಯಲು ಬೇಕು
ಭ್ರಾಂತಿ ಕ್ರೋಧವ ಕಳೆಯಲು ಬೇಕು
ಸಂತರ ಸಂಗದಿ ರತಿಯಿರಬೇಕು ll 5 ll
ಗುರುವಿನ ಚರಣಕ್ಕೆರಗಲು ಬೇಕು
ತರಣೋಪಾಯವನರಿಯಲು ಬೇಕು
ವಿರಕ್ತಿ ಮಾರ್ಗದಲಿರಬೇಕು ll 6 ll
ಬಂದದ್ದುಂಡು ಸುಖಿಸಲು ಬೇಕು
ನಿಂದಾ ಸ್ತುತಿಗಳ ತಾಳಲು ಬೇಕು
ತಂದೆ ಪುರಂದರವಿಟ್ಠಲನೆನಬೇಕು ll 7 ll
***
