ರಾಗ - : ತಾಳ -
ಮೋಸ ಹೋದೆನಲ್ಲ ವಿಟ್ಠಲ ಮೋಸ ಹೋದೆನಲ್ಲ ll ಪ ll
ಆಸೆಬಿಟ್ಟು ಹಂಬಲಿಸಿ l
ಹೇಸಿ ನರಕದೊಳಗೆ ಸಿಲುಕಿ ll ಅ ಪ ll
ಪುಷ್ಪ ಶ್ರೀ ತುಳಸಿಯನ್ನು l
ಒಪ್ಪದಿಂದ ಮನೆಗೆ ತಂದು ll
ಅಪ್ಪ ಕೃಷ್ಣನ ಪೂಜೆಯ ಮಾಡಿ ಮೇ l
ಲಿಪ್ಪ ಲೋಕವ ಸೂರೆಗೊಳದೆ ll ೧ ll
ಕಾಯದಾಸೆಗೆ ಕಂಡುದ ಬಯಸಿ l
ನಾಯಿಯಂತೆ ಮನೆಮನೆ ತಿರುಗಿ ll
ಮಾಯಾಪಾಶದೊಳಗೆ ಸಿಲುಕಿ l
ಜೀಯ ನಿನ್ನನು ಧ್ಯಾನಿಸಲರಿಯದೆ ll ೨ ll
ಸತಿಸುತರು ಪಿತೃ ಬಾಂಧವರು l
ಪಥವ ತೋರಿಸಬಲ್ಲರೆ ಇವರು l
ಗತಿ ನೀನೇ ಪುರಂದರವಿಟ್ಠಲ l
ಹಿತವ ಕಾಯಿ ತಂದೆ ನೀನು ll ೩ ll
***
