ರಾಗ - : ತಾಳ -
ರಾಮ ರಕ್ಕಸ ಸಂಕುಲ ಭೀಮ
ಮುನಿದರೆ ಲೋಕ ವಿರಾಮ l ಸಾಮಸನ್ನುತ ನಿಸ್ಸೀಮ ll ಪ ll
ಕಾಮಿತಾರ್ಥ ಸುಮಹೋದಧೆ ನಿ
ಷ್ಕಾಮನ ಮಾಡೆಲೊ ವಾಮನ ಮೂರ್ತಿ ll ಅ ಪ ll
ಶ್ಯಾಮಾ ರವಿ ಕುಲವಾರಿಧಿ ಸೋಮ l ಕಟ್ಟಿದೆ ಕಡಲಲಿ ಧಾಮ l
ಸುರಪಗುಂಟು ತವ ಪ್ರೇಮ l ನಿರ್ಜಿತ ವೈರಿ ಸುತ್ರಾಮ ll
ಕಾಮನಯ್ಯ ಕಮ l ನೀಯ ಮೂರುತಿಯೆ
ಕಾಮಿಪೆ ನಿನ್ನನು l ಭೂಮ ಗುಣಾರ್ಣವ ll 1 ll
ದಾತಾರಮ್ಮೆಗು ನಿಲುಕ ವಿಖ್ಯಾತ l ಬೊಮ್ಮನ ಪೆತ್ತನು ಸ್ವರತ
ಭಕುತರ ನಡತೆಗೆ ಪ್ರೀತ l ಜಡ ಜಂಗಮದಲಿ ವಿತತ ll
ವೀತಿ ಹೋತ್ರ ಸಖ l ಮಾತರಿಶ್ವ ಪ್ರಿಯ
ಪೂತನಿ ಮಾರಕ l ಪಾತಕ ಕಳೆಯೋ ll 2 ll
ಬಾಲಾ ಕೆಡಿಸಿದೆ ಗೋಪೇರ ಶೀಲಾ l ಜನನಿಗೆ ತೋರಿದೆ ಲೀಲಾ
ವದನದಿ ಲೋಕ ವಿಶಾಲಾ l ಮಾವ ಕಂಸಗೆ ನೀ ಕಾಲಾ ll
ಪಾಲು ಮೊಸರು ಬೆಣ್ಣೆ l ಲೀಲೆಯಿಂದಲಿ ಮೆದ್ದು
ಜಾಲತನದಿ ನಿಮ್ಮ l ಬಾಲರೆಂದ್ಹೇಳಿದೆ ll 3 ll
ಶ್ರೀತಾಕೇಶಿ ನಿಷೂದನ ವೃಷ್ಟೀಶ l ಸೋಜಿಗವೇನಿದು ಸರ್ವೇಶ
ಸಂತತ ಭಜಿಪರ ಅಘನಾಶ l ದಾಸ ಜನರ ಹೃತ್ತೋಷ ll
ವಾಸವ ಮುಖ ದೇ l ವೇಶ ನಿನ್ನಯ ಪಾದ
ಆಶ್ರಯ ದೊಳಗಿಟ್ಟು l ಪೋಷಿಸು ಎನ್ನ ll 4 ll
ಕರ್ತಾ ರಕ್ಷಿಸೆನ್ನ ತ್ರಿಜಗದ್ಭರ್ತ l ನೀ ಲೋಕೈಕ ಸಮರ್ಥ
ಗುರು ಕರುಣದಿ ನಾನು ಕೃತಾರ್ಥ l ಒರೆವೆನೊ ನಾನೊಂದು ವಾರ್ತಾ
ಆರ್ತೇಷ್ಟದ ಗುರು l ಗೋವಿಂದವಿಟ್ಠಲ
ಮೂರ್ತಿ ನೆಲೆಸೊ ಮಮ l ಹೃತ್ಕಮಲದಲಿ ll 5 ll
***
