ರಾಗ: [ಮೋಹನ/ಭೂಪ್] ತಾಳ: [ಖಂಡಛಾಪು]
ವಂದಿಸುವುದನವರತ ತುಂಗಾತೀರದ ಯತಿಯ
ಮಂದಾರ ತರುವಂತೆ ಭಕ್ತರಿಷ್ಟವ ಕೊಡುವ ಪ
ಅಂದು ಗೋಗಳ ಕಾಯ್ವ ಬಾಲಕಗೆ ಕರುಣದಲಿ
ಬಂದ ವಿಘ್ನವ ಕಳೆದು ಅತಿ ಶೀಘ್ರದಲಿ
ಚಂದದಧಿಕಾರದಲಿ ಮೆರೆವಂತೆ ಮಾಡಿದ
ಸುಂದರ ಯತಿಗಳನು ಮನಮುಟ್ಟಿ ಭಜಿಸಿ 1
ತನಿಖೆ ಮಾಡಲು ಬಂದ ಆಂಗ್ಲಾಧಿಕಾರಿ
ಮನದಿಷ್ಟ ತಿಳಿಸುತಲಿ ಅವನ ಹರಸಿ
ಮನದ ಮಂದಿರದಲ್ಲಿ ನಿರುತ ರಾಮರ ಪೂಜೆ
ಅನವರತ ಮಾಡುತಿಹ ಮುನಿಗಳನ್ನು 2
ಶರಣರ ಸುರಧೇನು ಕರೆದಲ್ಲಿ ತಾ ಬರುವ
ಮರೆಯದಲೆ ಭಕುತರನು ಪೊರೆವ ಗುರುವು
ಗುರುಶಾಮಸುಂದರನ ಪರಮ ಪ್ರೀತಿಯ ಪಡೆದ
ನಿರುತವು ನೆನೆಯುತಿರೆ ಸಕಲ ಸಂಪದವೀವ 3
***
