ಆರ ಮೊರೆ ಇಡಲೊ ಹರಿ ಎನ್ನ ankita gurugovinda vittala

 ರಾಗ - : ತಾಳ -

ಆರ ಮೊರೆ ಇಡಲೊ - ಹರಿ ಎನ್ನ

ಪೊರೆವ ಭಾರ ನಿನ್ನದೆಲೊ ll ಪ ll

ಈರ ಪತೆ ಭವ ವಾರಿಧೀಯನು l

ಪಾರು ಮಾಡುವರಾರು ಪೇಳೋ ll ಅ ಪ ll

ಈಶ ನೀನಹುದೋ l ಉಮೇಶ ಸಖ -

ಲಕ್ಷ್ಮೀಶ ನೀನಹುದೋ ll

ವೀಶ ಶೇಷ ಗಿರೀಶ ವಾಸವ l

ಪೋಷಕನೆ ಮಧ್ವೇಶ ಪೊರೆ ll 1 ll

ವಿಶ್ವೇಶ ನೀನಹುದೋ l

ವಿಧಿಯ ಪಿತ ವಿಶ್ವಾಧಾರ ನೀನಹುದೋ l

ವಿಶ್ವ ವ್ಯಾಪಕ ವಿಶ್ವವಂದ್ಯನೆ l

ವಿಶ್ವ ಮೋಹೈಶ್ವರ್ಯ ರೂಪೀ ll 2 ll

ವಿತತ ನೀನಹುದೋ ವಿಸ್ತರದ ಮಹಿಮ l

ವೀತ ಭಯನಹುದೋ ll

ಯತನ ಜ್ಞಾನೇಚ್ಛಾದಿ ಪ್ರೇರಕ l

ಸ್ಥಿತಿ ಮೃತಿ ಸತ್ತಾದಿ ಪ್ರದನೇ ll 3 ll

ಸುರ ತರುವೆ ನೀನಹುದೋ l ಶರಣು ಪೋಷಕ l

ಸುರಧೇನು ನೀನಹುದೋ l

ಶರಣ ಜನ ಕರ್ಮಾದಿ ಋಣಹರ l

ಮೊರೆಯಿಡುವೆ ಚರಣಕ್ಕೆ ಎನ್ನ ಪೊರೆ ll 4 ll

ಬಿಂಬ ನೀನಹುದೋ l ಸಿರಿ ಬೊಮ್ಮ ಮುಖ್ಯ l

ಬಿಂಬ ನೀನಹುದೋ l

ಬಿಂಬ ಗುರುಗೋವಿಂದವಿಟ್ಠಲ l

ಇಂಬು ತವಪದ ಅಂಬುಜದಿ ಕೊಡು ll 5 ll

***