ಶ್ರೀ ವಿದ್ಯಾ ಪ್ರಸನ್ನ ತೀರ್ಥರು - ಶ್ರೀ ವ್ಯಾಸರಾಜ ಗುರುಸಾರ್ವಭೌಮರ ಮೇಲೆ ರಚಿಸಿದ " ಲಾವಣಿ ಪದ "
ವರ ಕರ್ನಾಟಕ ಸಿಂಹಾಸನ-
ವಚ್ಚಳಿಯದೆ ನಿಂತಿತು ಈ ಸ್ಥಳದಿ ।
ದೊರೆಗಳು ಧರೆಯಲಿ ಉರುಳಿ
ಉರುಳಿತಿರೆ ನಿರುತವು
ದೊರೆ ಶ್ರೀ ವ್ಯಾಸರಾಜ ।। 1 ।।
ಬಾಲರೆ ಬನ್ನಿ ದರ್ಶನ ಮಾಡಿರಿ
ಬಾಲ ಬ್ರಹ್ಮಚಾರಿಗಳಿವರು ।
ಉಭಯ ಸಾಮ್ರಾಜ್ಯಕೆ ಚಕ್ರವರ್ತಿಗಳು
ಅಭಯವನಿತ್ತರು ಜಗಕೆಲ್ಲ ।। 2 ।।
ವಿಜಯವ ಪಡೆದರು ವಾದಗಳಲಿ
" ಪ್ರತ್ಯರ್ಥಿ ಗಜಕೇಸರಿ "
ಯೆಂದೆನಿಸಿದರು ।
ಸುಂದರ ಚರಣರು ಸುಜನ
ಪಯೋನಿಧಿ ಚಂದಿರನಂದದಿ
ಹೊಳೆಯುವರು ।। 3 ।।
ಅಭಿಷೇಕವು ರತ್ನಗಳಿಂದಿವರಿಗೆ
ಅಭಿನವ ಪ್ರಹ್ಲಾದರೆ ಇವರು ।
ಗುಣಗಣ ನಿಲಯನ ಗುಣಗಳ
ತೋರಿದ ಮುನಿತ್ರಯದಲಿ
ಸೇರಿದರಿವರು ।। 4 ।।
ಜ್ಞಾನಿಗಳಿಗೆ ದೊಡ್ಡ ಜ್ಞಾನ
ಭಂಡಾರವು ನಾನಾ
ಶಾಸ್ತ್ರಗಳರಿತವರು ।
ಕುಹುಯೋಗವ ಪರಿಹಾರವ
ಮಾಡ್ದರು ಇಹ ಲೋಕದಿ
ಸಮರ್ಯಾರಿಹರು ।। 5 ।।
ಚಂದ್ರಿಕಾ ನ್ಯಾಯಾಮೃತ
ತರ್ಕತಾಂಡವ ಯೆಂದಿಗೂ
ಶ್ರೇಷ್ಠದ ಗ್ರಂಥಗಳು ।
ಮುಂದಿಟ್ಟರು ಪರವಾದಿಗಳಿಗೆ
ಬಂದೊದಗಿತು
ಗಂಟಲ ಗಾಣಗಳು ।। 6 ।।
ಕಟು ಶಾಸ್ತ್ರಗಳನು ಸ್ಫುಟದಿ
ವಿವರಿಸೆ ಸ್ಫುಟವಾಯಿತು
ಈ ಜಗವೆಲ್ಲೂ ।
ಪಟುತಮ ಕನಕ ಪುರಂದರ
ಶಿಷ್ಯರು ದಿಟ
ತೋರಿದರಿವರನುಗ್ರಹದೀ ।। 7 ।।
ಮಠಗಳಲುತ್ತಮ ಮಠವಿದು
ಇತರರಿಗೆಟುಕದ
ಕೀರುತಿ ಗಳಿಸಿಹುದು ।
ವಾದಿರಾಜ ವಿಜಯೀ೦ದ್ರ
ಪ್ರಮುಖರು ಪರಮಾದರದಿ
ಶಿರ ಬಾಗಿದರು ।। 8 ।।
ಓದಿದರೆಲ್ಲರು ಶಿಷ್ಯರೆನಿಸಿದರು
ಪಾದರಜವ ಶಿರದಿ ಧರಿಸಿದರು ।
ವಾಗ್ಮಿಗಳೆಲ್ಲರು ಪಿಗ್ಮಿಗಳಾದರು
ವಾಗ್ಮಿವರೇಣ್ಯರ ಎದುರಿನಲಿ ।। 9 ।।
ರುಕುಮಿಣಿ ರಮಣನು ಕುಣಿದನು
ನಲಿದನು ಅಗ್ಗದಿ
ಗುರುರಾಜರ ಮುಂದೆ ।
ಪುಣ್ಯಶಾಲಿಗಳು ಆರಾಧಿಸುವ
ಪ್ರಸನ್ನ ಮಾನಸದಿ ನಡುಗಟ್ಟಿ ।। 10 ।।
*****
