by narayana dasa
ಕಾಮಿನಿ ನೋಡೆ ವಟುವಾಮನಾನಾಗಮನಾ
ಕಾಮಿಸಿ ಭಿಕ್ಷೆಯ ಸ್ವಾಮಿಯು ಬರುತಿಹ ॥
ಅದಿತಿಯು ಕಾಮಿಸಿ ದಧಿವ್ರತ ವಿರಚಿಸಿ
ಪದುಮದಳಾಕ್ಷನ ಮುದದಲಿ ಪಡದಳು ॥
ಜನನಿಗೆ ನಮಿಸಲು ವಿನಯದಿ ಹರಸುತ
ದನುಜರ ಜೈಸಲು ಘನವರವಿತ್ತಳು ॥
ಕರದಿ ಕಮಂಡಲ ಧರಿಸಿ ಭೂಮಂಡಲ
ಚರಿಸುತ ಬಲಿಗೃಹ ಕಿರದೆ ಬರುವನಹಾ ॥
ಕೊರಳೊಳು ಜಪ ಸರ ಬೆರಳೊಳಗುಂಗುರ
ಉರದಿ ಪೀತಾಂಬರ ಧರೆಗೆ ಪ್ರಭಾಕರ ॥
ಭಿಕ್ಷೆಯಪೇಕ್ಷಿಸುತಾಕ್ಷಣ ಬಲಿಯೊಳು
ಕುಕ್ಷಿಯೊಳೀರಡಿ ವಕ್ಷದೊಳೊಂದಡಿ ॥
ದಿನದಿನ ಭಕತನ ಮನೆಯನು ಕಾಯುವ
ದಿನಪ ನಾರಾಯಣ ಕನಕವನೀಯುವ ॥
***
