ಕಂದಘೇಳಿದರು ಪುರಂದರದಾಸರು ankita gurumadhwapati vittala

 ರಾಗ - : ತಾಳ -

ಕಂದಘೇಳಿದರು ಪುರಂದರದಾಸರು l

ತಂದೆ ಹನುಮಗೆ ನೈವೇದ್ಯ l

ಇಂದು ಕೊಟ್ಟು ಬಾಯೆಂದು ll ಪ ll 

ಮಾತುಗಳ ಕೇಳಿ ತನ್ನ ಮಾತೆಯ ಬಳಿ ಬಂದು l

ಪ್ರೀತಿಯಿಂ ನೈವೇದ್ಯ ಬಡಿಸಿಕೊಂಡು l

ಶ್ರೀತುಳಸಿ ಪುಷ್ಪ ಗಂಧಾಕ್ಷತಿಯಿಂದ ಪೂಜೆಯ ಮಾಡಿ l

ವಾತಜನೆ ಬಾಯ್ದೆರೆಯೊ ತುತ್ತು ನಿಕ್ಕುವೆನೆಂದ ll ೧ ll

ಏನು ಮಾಡಿದರು ಬಾಯ್ದೆರೆಯದಿರಲು ನಾನು l

ಪ್ರಾಣವನು ಕೊಡುವೆ ನೆಂತೆಂದು ನಿಂತು l

ಏನುಕಾರಣ ತಂದೆ ತುತ್ತನೊಲ್ಲೆ ನೀನು l

ನಾನು ಮಾಡಿದಪರಾಧವೇನು ಹೇಳೊ ಹನುಮ ll ೨ ll

ಹೀಗೆ ಎನಲಾವಾಗ ಬ್ಯಾಗ ಬಾಯ್ದೆರೆದು l

ತುತ್ತುಕೊಂಡು ತೆಗೆನಿಲಲೂ l

ಹೀಗೆ ಒಂದೆರಡು ನಾಲ್ಕು ದಿನವು ಆಗುತಿರೆ l

ಯೋಗಿ ನಾರದವತಾರ ದಾಸರು ನೋಡೆ ll ೩ ll

ಅನ್ನ ಭಕ್ಷ್ಯಗಳು ಪರಮಾನ್ನ ಶಾಖಗಳೆಲ್ಲ l

ಚನ್ನವಾದ ದಧಿಘೃತ ಕ್ಷೀರವೆಲ್ಲ l

ಚನ್ನಿಗನೆ ನೀನುಂಡ್ಯೊ ಏನು ಮಾಡಿ ಬಂದೆನೆ ಪ್ರ l

ಸನ್ನ ಹನುಮನು ಸತತ ಇನ್ನು ಉಣಥಾನದಕೊ ll ೪ ll

ಎಲ್ಲೆ ಮಾತಿದು ಉಂಟೆ ಕಲ್ಲು ಹನುಮ ಉಂಬೋದು l

ಬಲ್ಲೆನೊ ನೀನುಂಬೋದ್ಯಲ್ಲ ಎನಲು l

ಇಲ್ಲ ನಿಮ್ಮಾಣೆ ಹುಸಿಯಾಡುವವ ನಾನಲ್ಲ l

ಅಲ್ಲಿ ನಡಿರೈಯ್ಯ ನಾನೆಲ್ಲ ತೋರಿಸುಥೀನಿ ll ೫ ll

ಕಂದನಾ ನುಡಿಗೆ  ಛನ್ದದಿಂ ಪರಮಾ l

ನಂದದಲಿ ಗುಡಿಯೊಳಗೆ ಪೋಗಿ ನಿಲಲೂ l

ಗಂಧ ಅಕ್ಷತಿ ತುಳಸಿ ಪುಷ್ಪ ಪೂಜೆಯ ಮಾಡಿ l

ತಂದೆ ಹನುಮನೆ ಉಣ್ಣೋ ಎಂದರುಣವಲ್ಲನಾಗ ll ೬ ll

ಉಣುತಿಯೊ ಇಲ್ಲವೋ ನಾ ಪ್ರಾಣವನು ತ್ಯಜಿಸಲೊ l

ಘನ ಮಹಿಮ ಹೇಳೆಂದು ಪಿಡಿದು ಜಿಹ್ವೆ l

ಯನು ಬಿಗಿಯಲಾಕ್ಷಣದೊಳಗೆ ಬಾಯ್ದೆರೆದುತಾ l

ಅನುಮಾನ ಮಾಡದಲೆ ಹನುಮ ಬಳಿದುಂಡಾಗ ll ೭ ll

ಈ ಮಹಿಮೆಯನು ನೋಡಿ ಪ್ರೇಮದಲಿ ಮಗನಪ್ಪಿ l

ಸೋಮಶೇಖರಪ್ರಿಯ ಒಲಿದ ನಿನಗೆ l

ಕಾಮಿತಾರ್ಥವ ಕೊಡುವ ಕಲ್ಪತರು ಸ್ವಾಮಿಹನುಮ l

ಭೀಮ ಮಧ್ವರ ದಯಕೆ ಪ್ರೇಮ ಪಾತ್ರನಾದಿ ll ೮ ll

ಜಯಜಯತು ಜಯ ಹನುಮ ಜಯಜಯತು l

ಜಯ ಭೀಮ ಜಯಜಯತು ಗುರುಮಧ್ವರಾಯ l

ಜಯತು ಜಯಜಯತು ಗುರುಮಧ್ವಪತಿವಿಟ್ಠಲನ ದಾಸನಿಗೆ l

ಜಯಜಯತು ಜಯತು ಯಂತ್ರೋದ್ಧಾರಕ ಹನುಮಗೆ ll ೯ ll

**