ರಾಗ : ಪೀಲು ತಾಳ : ದೀಪಚಂದಿ
ಕರುಣದಿ ಕೊಡು ವರವ ।
ಗುರು ಮಹಾದೇವ ।। ಪಲ್ಲವಿ ।।
ನಿರುತ ಸ್ಮರಿಸುವ ।
ಶರಣ ಸಂಜೀವ ।
ಪರಿಪಾಲಿಸನುದಿನ ।।
ಹರಿ ಕುಮಾರನ ।
ಗರ್ವವನದಾವ -
ಮಹಾನುಭಾವ ।। ಅ ಪ ।।
ಸ್ಫಟಿಕ ಸನ್ನಿಭ ಧವಳ ಶುಭಗಾತ್ರ ।
ಕುಟಿಲ ದಾನವ ಕಟಕ
ವಂಚಕ ಯಕ್ಷಪತಿ ಮಿತ್ರ ।
ಚಟುಲ ವಿಕ್ರಮ
ಸುಗಮದಯ ಧೂರ್ಜಟಿಯೆ
ಸುಚರಿತ್ರ ।
ಹೇ ನಿಟಿಲ ನೇತ್ರ ।। ಚರಣ ।।
ಆದ್ರಿ ವೈರಿಯ ತನಯ-
ನೊಡನೆ ಯುದ್ಧಗೈದಾತ ।
ಭದ್ರದಾಯಕ ರುದ್ರದೇವ
ಪ್ರಸಿದ್ಧ ಮುನಿ ನಮಿತ ।
ಸ್ವರ್ದುನೀಧರ ದದ್ದಲಾಪುರಸದ್ಮ
ಸುಖದಾತ ಹೇ ಸದ್ಯೋಜಾತ ।। ಚರಣ ।।
ಶ್ಯಾಮಸುಂದರ ಸ್ವಾಮಿ
ಪ್ರಿಯ ಸಖ ಸೋಮಶೇಖರನೆ ।
ಪ್ರೇಮದಿಂದಲಿ ರಕ್ಷಿಸೆನ್ನನು
ಭೂಮಿಸ್ಯಂದನನೇ ।
ಕಾಮಿತಪ್ರದ ವಾಮದೇವನೇ
ಹೇಮವತಿಧವನೇ
ನಿಸ್ಸೀಮ ಮಹಿಮನೆ ।। ಚರಣ ।।
*****
