ಸುಮ್ಮನೊಲಿವನೆ ಪರಬೊಮ್ಮನಾದ ankita varaha timmappa

by ನೆಕ್ಕರ ಕೃಷ್ಣದಾಸರು
ರಾಗ ಮಧ್ಯಮಾವತಿ ಆದಿತಾಳ

ಸುಮ್ಮನೊಲಿವನೆ ಪರಬೊಮ್ಮನಾದ 
ತಿಮ್ಮರಾಯ ಸುಮ್ಮನೊಲಿವನೆ? ||ಪ||

ಮಂದವಾರ ದಿವಸದಲ್ಲಿ
ಮಿಂದು ಮಡಿಯನುಟ್ಟುಕೊಂಡು ಗೋ
ವಿಂದ ಎನುತ ನಾಮವಿಕ್ಕಿ
ವಂದನೆಯ ಮಾಡದನಕ ||೧||

ಗರ್ವವನ್ನು ಉಳಿದು ಮನದಿ
ಸಾರ್ವಭೌಮನನ್ನು ನೆನೆದು
ನಿರ್ವಹಿಸಿ ಶೇಷನು ಸುತ್ತಿದ
ಪರ್ವತವನ್ನು ಏರದನಕ ||೨||

ಕಾಸು ದುಡ್ಡು ಚಕ್ರನಾಣ್ಯ
ವೀಸವುಳಿಯದಂತೆ ಬಡ್ಡಿ
ವಾಸಿಯಿಕ್ಕಿ ಗಂಟ ಕಟ್ಟಿ
ಈಸುಕೊಂಡು ಸೂಸದನಕ ||೩||

ದೇಶ ದೇಶದಿಂದ ಕಪ್ಪ
ಗಾಸಿಯಾಗದಂತೆ ತರಿಸಿ
ಕೋಶಕಿಕ್ಕಿ ಕೊಂಬ ಲಕ್ಷ್ಮಿಯ
ಈಶನನ್ನು ನೆನೆಯದನಕ ||೪||

ಗುಡವ ಕದಡಿಕೊಂಡು
ಸಂಗಡ ಕಡಲೆಯನ್ನು ನೆನೆಸಿ ಇಟ್ಟು
ಒಡೆದ ನಾರಿಕೇಳವು ಸಹಿತ
ಒಡೆಯಗೆಂದು ಇಡದ ತನಕ ||೫||

ಆಶಾಪಾಶವನ್ನು ಬಿಟ್ಟು
ದೇಶವನ್ನು ತೊಳಲಿ ಬಳಲಿ
ಕೇಶವಾದಿ ನಾಮದೊಳಗೆ
ವಾಸುದೇವನ ನೆನೆಯದನಕ ||೬||
*****