ಹರಿಯ ನೆನೆವನೆ ಅಜ್ಞಾನಿ ಘೋರ purandara vittala

ರಾಗ ಪೂರ್ವಿ ಆದಿತಾಳ

ಹರಿಯ ನೆನೆವನೆ ಅಜ್ಞಾನಿ , ಘೋರ-
ದುರಿತಗಳಿಗೆ ಸಿಲುಕುವನೆ ಸುಜ್ಞಾನಿ ||ಪ||

ತಂದೆಯ ಬಯ್ಯುವನೆ ಪುತ್ರ , ಕಡು
ನಿಂದೆಯ ಮಾಡ್ವನೆ ಪರಮಪವಿತ್ರ
ಬಂಧನವ ಗೆಯ್ವನೆ ಮಿತ್ರ , ರಣಕೆ ಮುಂದಾಗಿ
ನಡೆಯದಿರುವನೆ ಕ್ಷಾತ್ರ ||

ದಾನಂಗಳೀವನೆ ಪಾಪಿ , ಕಡು
ದೀನರ ದಂಡಿಸುತಿರುವನೆ ಪ್ರತಾಪಿ
ಮೌನದಿಂದಿರುವನೆ ಕೋಪಿ , ಮತ್ತೆ
ಏನೇನು ತಿಳಿಯದವನೆ ನಿರ್ಲೇಪಿ ||

ಮದನನಂತಿರ್ಪನೆ ಕೇಡ , ತನ್ನ
ಹೃದಯದಿ ಹರಿಯ ಭಜಿಸುವನೆ ಮೂಢ
ಕದನಕೆಳಸುವನೆ ಪ್ರೌಢ
ನಮ್ಮ ಪುರಂದರವಿಠಲನ ನೋಡ್ವನೆ ಕುರುಡ ||
*******