ಜಯ ಮಂಗಳಂ ನಿತ್ಯ ಶುಭಮಂಗಳಂ ಮಂಗಳಂ ಶ್ರೀತುಳಸೀ purandara vittala

ರಾಗ ಸೌರಾಷ್ಟ್ರ       ರೂಪಕತಾಳ 

ಜಯ ಮಂಗಳಂ ನಿತ್ಯ ಶುಭಮಂಗಳಂ ॥ ಪ ॥
ಮಂಗಳಂ ಶ್ರೀತುಳಸೀದೇವಿಗೆ ।
ಮಂಗಳಂ ವೃಂದಾವನವಾಸಿಗೆ ॥ ಅ ಪ ॥

ನೋಡಿದ ಮಾತ್ರಕ್ಕೆ ದೋಷಸಂಹಾರಿಗೆ ।
ಬೇಡಿದ ವರಗಳ ಕೊಡುವಳಿಗೆ ॥
ಮಾಡೆ ವಂದನೆಯನು ಮನುಜರ ಪಾಪದ ।
ಗೂಡನೀಡ್ಯಾಡುವ ಗುಣವಂತೆಗೆ ॥ 1 ॥

ಮುಟ್ಟಿದ ಮಾತ್ರಕ್ಕೆ ಮುಕ್ತರವ ಮಾಡುವ ।
ಮುದದಿಂದ ಉದ್ಧರಿಸುವ ಮುನಿವಂದ್ಯೆಗೆ ॥
ಕೊಟ್ಟರೆ ನೀರನು ಬೇರಿಗೆ , ಕಾಲನ ।
ಮುಟ್ಟಲೀಸದ ಹಾಗೆ ಮಾಳ್ಪಳಿಗೆ ॥ 2 ॥

ಬಿತ್ತಿ ಬೆಳೆಸಿ ತನ್ನ ಹೆಚ್ಚಿಸಿದವರಿಗೆ ।
ಚಿತ್ತದೊಲ್ಲಭ ಕೃಷ್ಣನ್ನ ಹರುಷದಲಿ ॥
ಅತ್ಯಂತವನು ತಾ ತೋರಿ ಭವದ ಬೇರ ।
ಕಿತ್ತು ಬಿಸಾಡುವೋ ಕೋಮಲೆಗೆ ॥ 3 ॥

ಕೋಮಲವಾಗಿದ್ದ ದಳಮಂಜರಿಗಳ ।
ಪ್ರೇಮದಿಂದಲಿ ತಂದು ಶ್ರೀಹರಿಗೆ ॥
ನೇಮದಿಂದರ್ಚಿಸೆ ಪರಮಾತ್ಮನೊಳು , ಜೀವ ।
ಕಾಮಿತಾರ್ಥವನೀವ ಸದ್ಗುಣಿಗೆ ॥ 4 ॥

ಕಾಷ್ಠವ ತಂದು ಗಂಧ ಮಾಡಿ ಶ್ರೀಕೃಷ್ಣಗೆ ।
ನಿಷ್ಠೆಯಿಂದಲಿ ಲೇಪ ಮಾಳ್ಪರ ॥
ಜ್ಯೇಷ್ಠರೆನಿಸಿ ವೈಕುಂಠದಲಿ ನಿಲಿಸಿ , ಸಂ - ।
ತುಷ್ಟರಾ ಮಾಡುವ ಸೌಭಾಗ್ಯೆಗೆ ॥ 5 ॥

ಅನ್ನವಾನುಂಡರು ನೀಚರ ಮನೆಯಲ್ಲಿ ।
ಉನ್ನಂತ ಪಾಪವ ಮಾಡಿದ್ದರೂ ॥
ತನ್ನ ದಳವ ನೊಂದ ಕರ್ಣದಲ್ಲಿಟ್ಟರೆ ।
ಧನ್ಯರ ಮಾಡುವ ದಯವಂತೆಗೆ ॥ 6 ॥

ಸರಸಿಜನಾಭನ ಸಲುಗೆಯ ರಾಣಿಗೆ ।
ಶರಣಜನರ ಪೊರೆವ ಸದ್ಗುಣಿಗೆ ॥
ತಿರುಪತಿನಿಲಯ ಶ್ರೀಪುರಂದರವಿಠ್ಠಲನ ।
ಚರಣ ಸೇವಕಳಾದ ಚಿನುಮಯಿಗೆ ॥ 7 ॥
********