ನಂಬಬೇಡ ನಂಬಬೇಡ ನಂಬಲೊಜ್ರ ಕಂಬವಲ್ಲ ankita varaha timmappa

by ನೆಕ್ಕರ ಕೃಷ್ಣದಾಸರು
ರಾಗ ಸೌರಾಷ್ಟ್ರ ಆದಿತಾಳ

ನಂಬಬೇಡ ನಂಬಬೇಡ
ನಂಬಲೊಜ್ರ ಕಂಬವಲ್ಲ ||ಪ||

ತುಂಬಿದ ಅಸ್ಥಿಮಾಂಸ ರಕ್ತ
ಜಂಬುಕನ ಬಾಯ ತುತ್ತ ||ಅ.ಪ||

ಎಂಬತ್ತನಾಲ್ಕು ಲಕ್ಷ
ಕುಂಭದೊಳು ಹೊಕ್ಕು ಬಳಲಿ
ನಂಬಲಾರದೊಂದು ಕ್ಷಣಕೆ
ಅಂಬರಕ್ಕೆ ಹಾರುವದ ||೧||

ಮಲವು ಬದ್ಧವಾದ ತನು
ಮಲೆತು ಇರುವುದೇನು
ಬಲುಹುಗುಂದಿದ ಮೇಲೆ
ಫಲವಿಲ್ಲದರಿಂದ ||೨||

ಮಾಳಿಗೆ ಮನೆಯ ಬಿಟ್ಟು
ಮಾಡಿದ ಓಗರ ಬಿಟ್ಟು
ಜಾಳಿಗೆ ಹೊನ್ನನು ಬಿಟ್ಟು
ಜಾರುವುದು ತನುವ ಬಿಟ್ಟು ||೩||

ಆಸೆಯನ್ನು ನೋಡಿ ಮೃತ್ಯು
ಮೋಸವನ್ನು ಯೋಚಿಸುವುದು
ಸಾಸಿರನಾಮನ ಭಜಿಸಿ
ದಾಸನಾಗು ಅನುದಿನ ||೪||

ಮಡದಿಮಕ್ಕಳು ಇವನ
ಕಡೆಯ ಬಾಗಿಲೊಳಗಿಟ್ಟು
ಒಡವೆವಸ್ತುಗಳನು ನೋಡಿ
ಅಡಗಿಸಿ ಇಡುವರಂತೆ ||೫||

ಈಗಲೋ ಇನ್ನಾವಾಗಲೊ
ಭೋಗದಾಸೆ ತೀರಲೊಂದು
ಹಾಗಗಳಿಗೆ ನಿಲ್ಲದಯ್ಯ
ಈ ಗರುವ ಪರುಮಾತ್ಮ ||೬||

ವಾರಕದಾಭರಣವನ್ನು
ಕೇರಿಯೊಳು ಕೊಂಬುವರಿಲ್ಲ
ವರಾಹ ತಿಮ್ಮಪ್ಪಗಿಟ್ಟು
ವಂದಿಸಿ ಕೈಗಳ ತಟ್ಟು ||೭||
******