ankita ವಿಠಲೇಶ
ರಾಗ: ಸೂರಮಲ್ಹಾರ ತಾಳ: ಝಂಪೆ
ಚಂದ್ರಿಕಾ ಚಿನ್ಮಯವು ಸಾಂದ್ರವಾಗಿದೆ ಪ್ರಭುವೇ
ಇಂದ್ರನೀಲಚ್ಛವಿಯ ವೃಂದಾವನದೊಳೆಸೆವ ಪ
ಮಾಯಿಮತಗಳನಳಿದು ನ್ಯಾಯಾಮೃತವ ಸುರಿಸಿ
ಶ್ರೀಯರಸ ಸನ್ನಿಧಿಯ ರಾಯರಂಜಿಸಿ ಮೆರೆವ 1
ತಂಡತಂಡದಿ ಬರುವ ಪುಂಡವಾದಿಗಳೆಲ್ಲ
ದಿಂಡುಗೆಡಹುತ ತರ್ಕತಾಂಡವಾಡಿಸುತಿರುವ 2
ಉದಧಿ ವೇದಾಂತದೊಳು ಉದಯಿಸಿದ ಸುಧೆಯೊಳಗೆ
ಮುದದಿ ಪರಿಮಳವೆರಸಿ ಬುಧರ ತೋಷಿಸುತಿರುವ 3
ಸೀತಾಪತಿಯ ಮಹಿಮೆ ಭೂತಳದಿ ಬೆಳಗಿಸಿದ
ನೂತನ ಪ್ರಕಾಶಮಯ ಗೀತಾವಿವೃತ್ತಿಯುತ 4
ನರಹರಿಯ ತೋರಿಸಿದ ಧೊರೆತನದಿ ಶೋಭಿಸಿದ
ವರದವಿಠಲೇಶಪ್ರಿಯ ಗುರು ರಾಘವೇಂದ್ರ ಮುಖ 5
****
