ರಾಗ: ಕೇದಾರಗೌಳ ತಾಳ: ರೂಪಕ
ಎಂಥ ಧನ್ಯನೋ ಗುರುವಿನ್ನೆಂಥ ಮಾನ್ಯನೋ ಪ
ಕಂತುಪಿತನ ನಾಮಸ್ಮರಣೆ ಸಂತತವು ಮಾಡುತಿರುವ ಅ.ಪ
ಭಕ್ತಿಯಿಂದ ಸೇವೆಗೈವ ಭಕ್ತರಘವ ನೀಗಿ ಪೊರೆವ
ಭಕ್ತಬಂಧುವೆನಿಸಿ ಮೆರೆವ ಮುಕ್ತಿಮಾರ್ಗ ಸತತ ತೋರ್ವ 1
ತುಂಗತಟದಿ ಬಂದು ನೆಲಸಿ ರಂಗನಾಥನ ಪಾದಸ್ಮರಿಸಿ
ಭಂಗಗಳನು ನೀಗಿ ಪೊರೆವ ಮಂಗಳಾಂಗ ರಾಘವೇಂದ್ರ 2
ಕಮಲಬಾಂಧವನಂತೆ ಶೋಭಿಸಿ ವಿಮಲಕೀರ್ತಿಯಿಂದ ಮೆರೆವ
ಕಮಲನಾಭನ ಧ್ಯಾನ ಮಾಳ್ಪ ನಿರ್ಮಲಾಂಗ ರಾಘವೇಂದ್ರ 3
ಕರ್ಮಶೀಲನಾಗಿ ಸತತ ಧರ್ಮಮಾರ್ಗವನ್ನು ಸಾರಿ
ಕರ್ಮದೋಷಗಳನು ಹರಿವ ನಿರ್ಮಲಾಂಗ ರಾಘವೇಂದ್ರ 4
ಕಾಮಿತಾರ್ಥವಿತ್ತು ಕಾಯ್ವ ಶ್ಯಾಮಲಾಂಗ ಕೃಷ್ಣವಿಠಲ-
ಸ್ವಾಮಿಯನ್ನು ಪೂಜಿಸುವ ಪ್ರೇಮಮಯನೆ ರಾಘವೇಂದ್ರ 5
***
