ಗಂಗಾದೇವಿಯೆ ನಿನಗೆ ಗಂಗಾದೇವಿ ಹಾಡು ankita madhwesha krishna

ಗಂಗಾದೇವಿ ಹಾಡು

 ಗಂಗಾದೇವಿಯೆ ನಿನಗೆ ಒಂದೇ ಮನದಲಿ ನೆನೆವೆ
 ಸಿಂಧುರಾಜನ ರಾಣಿ ನೀ ಕರುಣಿಸೆ
 ಮಂಗಳಾಂಗಿಯೆ ನಿನಗೆ ಮುಂದಲೆ ಬಾಗುವೆ
ಮಂದಗಮನಿಯೆ ನೀ ಸುಂದರಾಂಗಿ||ಪಲ್ಲ||

 ಎತ್ತ ನೋಡಿದರತ್ತ ಬಳಕುತ ಬರುವಿಯೆ
 ಸುತ್ತಿ ಸುತ್ತಿ ನೀನು ಪ್ರವಹಿಸುತ
 ಹತ್ತಿ ಇಳಿದು ಗಿರಿ ಶಿಖರದೊಳುರುಳುತ್ತ
 ಶಿಸ್ತಾಗಿ ನೀನು ಹರಿದು ಹೋಗುವಿ||೧||

ಹರಿ ಪಾದೋದಕವಾಗಿ ಹರಿದು ಬಂದಿಯೆ ನೀನು
ಹರಿಯ ಗಿರಿಯ ಸುತ್ತ ಸುಳಿದಾಡುವಿ
 ಸ್ಥಿರವಾಗಿ ಅಳಕನಂದನ ಜೊತೆಗೂಡಿ
 ಭರದಿ ಬರುವಿ ವಯ್ಯಾರದಿಂದ||೨||

ಅಳಕನಂದನ ಕೂಡಿ ಬಳುಕುತ್ತ ಬರುವೀಯೆ
 ಇಳೆಯೊಳು  ಮಿಗಿಲಾಗಿ ಪ್ರವಹಿಸುತ
 ಚಳಿ ಬಿಸಿಲೆನ್ನದೆ ಬಳ ಬಳ ಹರಿಯುವಿ
 ಕಳಿಯ ಸುರಿಯುವಿಯೆ ಕೋಮಲಾಂಗಿ||೩||

 ಅರಿಷಿಣ ಕುಂಕುಮ ಹಚ್ಚಿ ಬೆರಸಿದ ಮಲ್ಲಿಗೇರಿಸಿ
 ಪರಿ ಪರಿ ಪೂಜೆಯ ಮಾಡಿ
 ಮರದ ಬಾಗಿಣವನ್ನ ಮುತೈದೆಯರು ತಂದು
ಸರಸದಿ ನೀಡುವರೆ ತಾಯೆ||೪||

 ಮುಕ್ತ ಕಂಠದಿಂದ ನಿನ್ನ ಹಾಡಿ ಹೊಗಳುತ್ತ
 ಭಕ್ತಿಯಿಂದಾರುತಿಯನೆ ಮಾಡುತ
 ಶ್ರಧ್ಧೆಯಿಂದಲಿ ಮನೆಗೆ ಗಂಗೆ ತುಂಬಿಸಿಕೊಂಡು
ಮಧ್ವೇಶಕೃಷ್ಣನ  ಬೇಡುತ||೫||
**********