by yadugiriyamma
ಮಂಗಳಂ ಶ್ರೀಕೃಷ್ಣವೇಣಿಗೆ
ಜಯ ಮಂಗಳಂ ಜಗದುದ್ಧಾರಳಿಗೆ ಪ
ರಂಗನ ಪಾದದಿ ಗಂಗೆ ಉದ್ಧವಿಸಲು
ಅಂಗದಿಂದಾಗಲೆ ತಾನುದಿಸಿ ಬಂದು
ಗಂಗಾಧರನ ದೇಹದಿ ಬಂದು ವೇಣಿಯ
ಸಂಗಮವಾಗಿ ಬಂದ ದೇವಿಗೆ ಅ.ಪ
ಮುನ್ನೂರು ಅರವತ್ತು ನದಿಗಳೆಲ್ಲ ಕೂಡಿ
ಕನ್ಯಾರಾಶಿಗೆ ಗುರು ಬಂದಿರಲು
ಒಂದುಸಂವತ್ಸರ ವಾಸವ ಮಾಡಲು
ಅವರ ಪಾಪವ ಕಳೆದ ಶ್ರೀ ಕೃಷ್ಣವೇಣಿಗೆ 1
ಇಂದ್ರನ ಪಾಪವ ನದಿಗಳಿಗೆ ಬಿಡಲು
ನಿಂದಿತರಾಗಿ ದುಃಖಿಸುತ ಪೋಗಿ
ಇಂದಿರೆರಮಣನ ಆಜ್ಞೆಯಿಂದಲೆ
ಬಂದ ಕೃಷ್ಣವೇಣಿಗೆ ಗಂಗಾದೇವಿಗೆ 2
ವೇಣುಶೂರ್ಪಗಳಲ್ಲಿ ನಾನಾ ಫಲಗಳ ಇಟ್ಟು
ನೇಮದಿಂ ಬಾಗಿನಂಗಳ ಕೊಡಲು
ಮಾನಿನಿಯರೆಲ್ಲ ಮೌನದಿಂ ಕೊಡಲು
ಮಾಂಗಲ್ಯವಿತ್ತು ಸಲುಹುವ ದೇವಿಗೆ 3
ಕೃಷ್ಣತೀರದಲ್ಲಿದ್ದ ವೃಕ್ಷದೇವತೆಗಳು
ಋಷಿಗಳು ಪಾಷಾಣವಾಗಿರಲು
ನಕ್ರ ಮೊದಲಾದ ಜಂತುಗಳೆಲ್ಲ
ಯಕ್ಷರು ವಾಲೂಕ ಹರಿದ ಧೂಲಿಯಾಗಿಹರು 4
ಇಂದ್ರದಂಡಕ ದಂತ್ರಿಪಾಲ ಸೋಮಕ ಧರ್ಮ
ನಂದನ ನಳ ಹರಿಶ್ಚಂದ್ರರೆಲ್ಲ
ಬಂದು ಸ್ನಾನವ ಮಾಡೆ ಅವರ ಪಾಪಗಳ ಆ
ನಂದದಿಂ ಕಳೆದ ಕೃಷ್ಣವೇಣಿಗೆ 5
ಮಲಾಪಹಾರಿ ಭೀಮೆ ತುಂಗಭದ್ರೆಯು ಮೊ
ದಲಾದ ಮಹಾನದಿಗಳನು ಕೂಡಿ
[ಒಲವಿ]ಂದ ಸ್ನಾನಪಾನವ ಮಾಡಿದವರಿಗೆ
[ಲೋಲ] ಶ್ರೀನಿವಾಸನ ಪಾದತೋರ್ಪ ಕೃಷ್ಣವೇಣಿಗೆ 6
****
