ರಾಗ: ಕಾಂಬೋಜಿ ತಾಳ: ಝಂಪೆ
ಮೃತ್ಯುವೆಂಬುವ ಕುತ್ತು ಬೆನ್ಹತ್ತಿ ಬರುತಿಹುದು ಪ
ಎತ್ತಪೋದರು ಬಿಡದು ಸುತ್ತಿಕೊಂಡಿಹುದು ಅ.ಪ
ಬಾಳಕಡಲಲಿ ಮುಳುಗಿ ತೊಳಲಿದರೆ ಏನಹುದು
ಮಳಲಬೊಂಬೆಯತೆರದಿ ಕಳಲಿಹೋಹುದು ದೇಹ
ಬಳಲಿಬೆಂಡಾಗುತಲಿ ಕಳವಳಿಸಲೇನಹುದು
ಅಳಲಹರಿಸುವ ನಮ್ಮ ಗುರುರಾಜನ ಭಜಿಸೋ 1
ನೆಚ್ಚಿಬೆಳಸಿದ ದೇಹ ಕಿಚ್ಚಿನೊಳು ಬೇಯ್ವಾಗ
ಮೆಚ್ಚಿಗಳಿಸಿದ ಧನವು ಮುಚ್ಚಿ ಕಾಯ್ವದೇ ನಿನ್ನ
ನೆಚ್ಚಬೇಡವೋ ಈ ಕಾಯ ಎಚ್ಚೆತ್ತುಕೊಂಡಿರೋ
ಸ್ವಚ್ಚಮನದಿ ಇನ್ನು ಅರ್ಚಿಸೋ ಗುರುಗಳ 2
ಮರಣಕಾಲದಿ ನಿನ್ನ ಹರಣವ ಒಯ್ವಾಗ
ಶರಣುಶರಣೆಂದರೆ ಬಿಡುವರೇ ಮನುಜಾ
ಕರುಣಾಸಾಗರ ನಮ್ಮ ಸಿರಿಕೃಷ್ಣವಿಠಲನ
ಸ್ಮರಣೆಮಾಡುತಲಿನ್ನು ಗುರುರಾಜರನು ಭಜಿಸೋ 3
***
