..
ಪರಮಾನಂದದೊಳಿರುವ ಪರಿಯನರಿ
ಗರುವ ಬೇಡ ಹೇ ಮನಸಾ ಪ
ಸಿರಿವರ ನಾರಾಯಣ ನಾಮಾಮೃತ
ನರಘಳಿಗೆಯು ಮರೆಯದೆ ನೆನೆ ಮನಸಾಅ.ಪ
ಇಂದಿರೆಯರಸನ ಸುಂದರ ಚರಣಗ
ಳಂದದ ಶ್ರೀ ತುಳಸಿಯ ದಳದಿ
ಚಂದದೊಳರ್ಚಿಸಿ ಕುಂದದ ಭಕುತಿಯೊಳಾ
ನಂದದೊಳಿರು ಹೇ ಮನಸಾ 1
ಸಿರಿ ರಾಮನ ಮಂಗಳ ಮೂರ್ತಿಯ ಘನ
ಕೊರಳೊಳು ಹಾರಗಳರ್ಪಿಸುತ
ಪರಿಪರಿ ಪರಿಮಳ ಪುಷ್ಪಗಳಿಂದಲಿ
ಕರುಣಾಕರನನರ್ಚಿಸು ಮನಸಾ2
ಸರ್ವಾಂತರ್ಗತ ಜಗದುದರನ ನೀ
ನಿರ್ಮಲ ಪೀಠದಿ ಕುಳ್ಳಿರಿಸಿ
ಸರ್ವಷಡ್ರಸೋಪೇತ ಸುಭೋಜನ
ಸರ್ವಾತ್ಮನಿಗರ್ಪಿಸು ಮನಸಾ 3
ಸುಫಲ ಕ್ಷೀರ ತಾಂಬೂಲಗಳರ್ಪಿಸಿ
ಸಫಲಗೊಳಿಸು ಜನ್ಮವ ಮನಸಾ
ಅಪಾರಮಹಿಮನ ಗುಣಗಳ ಕೀರ್ತಿಸಿ
ಕೃಪಾನಿಧಿಯ ನಮಿಸೆಲೊ ಮನಸಾ 4
ಅಗಣಿತ ಮಹಿಮನಿಗಾರ್ತಿಗಳರ್ಪಿಸಿ
ಮಿಗೆ ಭಕ್ತಿಲಿ ನಮಿಸೆಲೊ ಮನಸಾ
ಸುಗುಣಮಣಿಯು ರಘುರಾಮವಿಠಲ ನಿ
ನ್ನಗಲದೆ ಹೃದಯದಲಿಹ ಮನಸಾ5
****
