ಬಾರೋ ಗುರು ರಾಘವೇಂದ್ರ ಯತಿಸಾರ್ವಭೌಮ ankita shreerama vittala

 ankita ಶ್ರೀರಾಮವಿಠಲ

ರಾಗ: [ಮಧ್ಯಮಾವತಿ] ತಾಳ: [ಮಿಶ್ರನಡೆ]

ಬಾರೊ ಗುರು ರಾಘವೇಂದ್ರ

ಯತಿಸಾರ್ವಭೌಮ ಪ

ವೀರ ಗುಣಗಂಭೀರ ಕರುಣಾಪೂರ್ಣ ಸಂಯುತ ದ್ವೈತ

ಗುರು ಮಧ್ವಾರ್ಯಚರಣಸರೋಜ ಸೇವಕ ಅ.ಪ

ಮಂತ್ರಾಲಯದ ಗುರುವೆ ಮನದಂತರಂಗದಿ

ಕಂತುಪಿತನ ತೋರಿಸೊ

ಸಂತಭಕ್ತರ ಸಂಗದಲಿ ನಾ

ನಿಂತು ಚರಣಸರೋಜಗೊಂದಿಪೆ 1

ಕರೆದಲ್ಲಿ ಬರುವನೆಂಬೊ ಬಿರುದುಳ್ಳ ಯತಿವರ

ತ್ವರಿತದಿ ವರವ ನೀಡೊ

ಪರಮ ಮಾನಸ ಮಂಟಪದಿ ನಾ

ಸ್ಮರಿಪ ಹರಿಯ ಸುಮೂರ್ತಿ ತೋರಲು 2

ಆಶ್ರಯದಾತ ಬಾರೊ ಸದಾಶಯ

ಭೂಸುರೇಂದ್ರನೆ ಬಾರೊ

ವಸುಧಿಜೆಯ ಕರಸೇವ್ಯ ಶ್ರೀರಾಮವಿಠಲನ ಮಾ-

ನಸಾಬ್ಧಿಸುಚಂದಿರನೆ 3

***