ರಾಮನಾಮ ಸುಧಾರಸ ದೊರಕಿತು ankita shreeshagopala vittala

ರಾಮನಾಮ ಸುಧಾರಸ ದೊರಕಿತು l

ಪ್ರೇಮದಿ ರುಚಿ ನೋಡಿರಿ ಜನರೆಲ್ಲ ll ಪ ll

ಕ್ಷೇಮದಿಂದ ಈ ಮಾನವ ಜನ್ಮವು l

ಕಾಮಿಸಿ ದುಸ್ತರ ತಿಳಿರೆಲ್ಲಾ ll ಅ ಪ ll

ಅಡವಿಯೊಳಗೆ ಸನ್ಮುನಿಗಳು ವುಕ್ಕಿನ l

ಪುಡಿಯ ಬುಕ್ಕಿ ತಪ ಮಾಡಿದರೂ l

ಕಡಲಶಯನ ನಮಗೊಲಿಯಲೆಂದು ನಿ l

ರ್ಭಿಡಿಯದಿಂದ ಕೊಂಡಾಡಿದರೂ l

ಬಡಬಾರದ ಬಹುಭಂಗವ ಬಟ್ಟರು l

ಕಡಿಗೆ ಸಿಗದೆ ಹುಡಿಕ್ಯಾಡಿದರೂ ll 1 ll

ಗೊಡ್ಡು ಶಾಣೆತನ ಗೋಡಿಯಂತೆ ನಿಮ l

ಗಡ್ಡವಾಯಿತೊಬ್ಬುದೆಲ್ಲಾ l

ಜಡ್ಡು ಭವದ ಸಂಸಾರದೊಳಗೆ l

ಯಡ್ಡನಾದರೆ ಸುಖವಿಲ್ಲಾ l

ಧಡ್ಡ ಜನರೇ ನಿಮಗೇನು ಧಾಡಿರ್ಯೋ l

ದುಡ್ಡು ಖರ್ಚು ಆಗುವುದಿಲ್ಲಾ ll 2 ll

ಮಾಮನೋಹರನ ಸುನಾಮ ನೆನದು ಸು l

ಧಾಮ ಧನ್ಯನಾದನು ಹಿಂದೆ l

ಭೂಮಿಯೊಳಗೆ ಬಹುಸುಲಭದಿಂದ l

ನಮಗಾ ಮಹಾತ್ಮ ದೊರಿವನು ಇಂದೇ l

ಪ್ರೇಮದಿ ಶ್ರೀಶಗೋಪಾಲವಿಟ್ಠಲನ l

ನಾಮ ಭಜಿಸಲತಿ ಜವದಿಂದ ll 3 ll

***