ರಾಗ – ಅಮೃತವರ್ಷಿಣಿ
ತಾಳ – ಆದಿತಾಳ
ಹೇ ಭಗವನ್ ನಾರಸಿಂಹ ನಖವಜ್ರಧರ
ಹೇ ಗಗನದೇವ್ಯಾಲಿಂಗಿತ ದಿವ್ಯಶುಭಾಂಗ ll ಪ ll
ಬಾಗುವೆ ನಿನಗೆ ದಯಾನಯನ ವಜ್ರದಿ ನೀ
ಯೋಗಸಿಂಹ ಎನ್ನ ಶಮಲಶೈಲವ ಸೀಳಿ ಸಲಹೋ ll ಅ ಪ ll
ಬಾಗಿದ ಬಾಲನ ನಂಬಿಕೆಯ ನುಡಿಯ ಪಾಲಿಸಲೆಂದು
ಮೃಗ-ನರಾರ್ಧ ರೂಪವತಾಳಿ ಸ್ತಂಭಸಂಭೂತನಾದೆ
ಬಾಗದ ದಿತಿಜನ ಅಂಕದಲಿಟ್ಟು ನಖಾಂಕುರದಿ ಸೀಳಿ ನೀ
ಮಗ 'ಅಜ'ನ ನುಡಿಯ ಪಾಲಿಸಿ 'ಋತಂಭರ'ನಾದೆ ll 1 ll
ಆ ವಿರುದ್ಧ ಅಣಿಮಾ-ಮಹಿಮಾದಿ ಧರ್ಮಗಳು ತನ್ನಲ್ಲಿ
ಅವರುದ್ಧವಾಗದೆ ಮೇಳನಗೊಳುವವು ಎಂದು ನೀ ತೋರಲು
ಸುವಿರುದ್ಧ ನರ-ಮೃಗತ್ವಗಳನು ಏಕತ್ರ ತೋರಿದೆ
ರವಸಿದ್ಧ 'ಈಶತ್ವ' ಸರ್ವತ್ರ ತನಗೆಂದು ತೋರಲು 'ಮೃಗೇಂದ್ರ'ನಾದೆ ll 2 ll
ನಮೋ ನಾಕನಾರಿಯರ ನಿಗಡಬಂಧನ ಬಿಡಿಸಿದ ಮೋಚಕಸಿಂಹ
ನಮೋ ಮೇಷಾತ್ಮಶಿವನ ಪಾಲಿಸಿ ಸತಿಗೆ ಸೌಭಾಗ್ಯವಿತ್ತ ಭದ್ರಸಿಂಹ
ನಮೋ ಶಕ್ರನ ವೃತ್ರಹನನ ಪಾಪಪಂಕವನು ಶೋಧಿಸಿದ ಶುಚಿಸಿಂಹ
ನಮೋ ವಿದ್ಯೇಶವಿಟ್ಠಲ ಕಾಯಲೆನ್ನ ಮನದಲಿ ನಿತ್ಯಮಿಂಚೋ ಮಹಾಸಿಂಹ ll 3 ***
