ತೇರಾನೇರಿ ಮೆರೆದು ಬರುವ ಭೂಸುರವಂದ್ಯ ಯಾರಕ್ಕ
ಗುರು ರಾಘವೇಂದ್ರರೆಂತೆಂಬೊ ಯತಿಕುಲತಿಲಕ ಕೇಳ್ತಂಗಿ ll ಪ ll
ಛಂದದಿ ಕುಂದಣ ಮಕುಟವ ಧರಿಸಿದ ಸುಂದರನೀತ ಯಾರಕ್ಕ
ತಂದೆಯ ಅಘಹರಿದು ನರಹರಿಯ ತೋರಿದ ಪ್ರಹ್ಲಾದರಾಯ ಕೇಳ್ತಂಗಿ ll 1 ll
ವಿಪ್ರರು ದಾಸರು ಯತಿತತಿಗಳ ಕೂಡಿ ಬರುತಿಹನೀತ ಯಾರಕ್ಕ
ಕಪ್ಪು ಕೃಷ್ಣನ ಒಪ್ಪಿಸಿ ಕುಣಿಸಿದ ವ್ಯಾಸರಾಯ ಕೇಳ್ತಂಗಿ ll 2 ll
ವರಹಜ ನದಿಯ ತೀರದಿ ಇದ್ದು ಭಕುತರ ಪೊರೆವವ ಯಾರಕ್ಕ
ಹರುಷದಿ ಆನಂದವಿಟ್ಠಲನ ಸಾರಿದ ಪರಿಮಳಾರ್ಯ ಕೇಳ್ತಂಗಿ ll 3 ll
***
