ವಿಠಲನ ಕಂಡೀರಾ ವರಾಹ ಹರಿ ankita varahahari vittala

ವಿಠಲನ ಕಂಡೀರಾ l ವರಾಹ ಹರಿವಿಠಲನ ಕಂಡೀರಾ ll ಪ ll

ಲೋಕದ ಜನರನು ಸೃಜಿಸುವ ವಿಠಲ l

ಲೋಕವನೆಲ್ಲವ ಸಲಹುವ ವಿಠಲ l

ಲೋಕಗಳೆಲ್ಲವ ನುಂಗುವ ವಿಠಲ l

ಲೋಕೈಕನಾಥ ಗುರುಗೋವಿಂದ ವಿಠಲ ll 1 ll

ನೀರಲ್ಲಿ ನಿಗಮವ ತಂದಂಥ ವಿಠಲ l

ನೀರಲ್ಲಿ ನಗವನು ಪೊತ್ತಂಥ ವಿಠಲ l

ನೀರಲ್ಲಿ ಹರಿಯನು ಕೊಂದಂಥ ವಿಠಲ l

ನೀರಲ್ಲಿ ಮಲಗುವ ಬಾಲಕೃಷ್ಣವಿಠಲ ll 2 ll

ಧಡ ಧಡ ಕಂಬದಿ ಬಂದಂಥ ವಿಠಲ l

ದಂಡಕಮಂಡಲು ಪಿಡಿದಂಥ ವಿಠಲ l

ಪಿಡಿಯುತ ಕೊಡಲಿಯ ಗುಡುಗಿದ ವಿಠಲ l

ದಂಡಕವನವನು ಸೇರಿದ ವಿಠಲ ll 3 ll

ಬಾಯಲ್ಲಿ ಬ್ರಹ್ಮಾಂಡ ತೋರಿದ ವಿಠಲ l

ಕೈಯಲ್ಲಿ ಗಿರಿಯನು ಎತ್ತಿದ ವಿಠಲ l

ಮೈಯಲ್ಲಿ ಅಂಗನೆಯಪ್ಪಿದ ವಿಠಲ l

ಕೈಯನ್ನು ಇಟ್ಟು ಹರಸಯ್ಯ ವಿಠಲ ll 4 ll

ತರುಳೆಯನ್ನು ಮೋಹಿಪ ವಿಠಲ l

ತುರಗವನ್ನು ಏರಿದ ವಿಠಲ l

ಕೊರವಂಜಿರೂಪವ ತಾಳಿದ ವಿಠಲ l

ತಿರುಮಲೆವಾಸಿ ವರಾಹ ಹರಿವಿಠಲ ll 5 ll

***