" ಶ್ರೀ ವ್ಯಾಸರಾಜ ಗುರುಸಾರ್ವಭೌಮರ ಸ್ತುತಿ "
ರಾಗ : ಆನಂದಭೈರವಿ ತಾಳ : ತ್ರಿಪುಟ
ಯೋಗಿವರ ವ್ಯಾಸರಾಯರೆಂಬ ವಿಚಿತ್ರ ।
ಮೇಘ ವಿಷ್ಣು ಪದವ ತೋರಿಸುತ್ತ ಬಂತಿದಿಕೊ ।। ಪಲ್ಲವಿ ।।
ವಾಯುಮತವೆಂಬ ತಾರಾ ಮಂಡಲವ ಮುಸುಕುತ್ತ ।
ವಾಯುಗತಿಯಂತೆ ಗಮಿಸುತ್ತಲಿ ।
ಹೇಯ ಕಾಮಾದಿಗಳೆಂಬ ರಜವ ನಡಿಗಿಸುತ ।
ನಾಯಕನುಪೇಂದ್ರನ ಆಜ್ಞೆಯ ಪಡೆದು ।। ಚರಣ ।।
ಅಂಗಜನೈಯ್ಯನೆ ಪರನೆಂದು ಘುಡಿ ಘುಡಿಸುತ್ತ ।
ಕಂಗಳನೆಂಬ ಮಿಂಚನೆ ನೆರೆಹಿ ಲೋಕದಿ ।
ಹಿಂಗದೆ ಪರಿವ ಅಜ್ಞಾನವೆಂಬ ಕತ್ತಲೆಯ ।
ಭಂಗಿಸಿ ಸುರೋತ್ತಮ ಪಥವ ತೋರಿಸುತ ।। ಚರಣ ।।
ಸಿರಿಯರಸನ ಸಮ್ಯಕ್ ಜ್ಞಾನವೆಂಬ ಪೈರಿಗೆ ।
ಬೇರು ಬಿಡೆ ಹರಿಕಥೆಯೆಂಬ ಮಳೆಗರಿದು ।
ನೆರೆ ಶಿಷ್ಯಮನವೆಂಬ ಕೆರೆತುಂಬಿ ಕರಗಳೆಂಬ ।
ಭರ ಕೋಡಿ ವಾರಿಸುತ್ತ ವಿಜಯೀ೦ದ್ರನ ಗುರು ।। ಚರಣ ।।
***
