ಅಸಾರವಾದ ಸಂಸಾರಸಾಗರವ ಪಾರುಗಾಣವುದೆಂದಿಗೊ ರಂಗಯ್ಯ ankita venkatakrishna

 by yadugiriyamma

ಅಸಾರವಾದ ಸಂಸಾರಸಾಗರವ

ಪಾರುಗಾಣವುದೆಂದಿಗೊ ರಂಗಯ್ಯ ಪ

ಘೋರಾಹಂಕಾರವ ಬಿಟ್ಟು ನಿನ್ನಯಪಾದ

ಸೇರುವುದಿನ್ನೆಂದಿಗೊ ಅ.ಪ

ಕಾಮಕ್ರೋದಲೋಭಮೋಹಂಗಳನೆಲ್ಲಾ

ದೂರಮಾಡುವದೆಂದಿಗೆ ರಂಗಯ್ಯ

ಡಂಬಾಸೂಯೆ ಅವಿದ್ಯಾಸಂಬಂಧವ

ಬಿಟ್ಟುಬಿಡುವುದೆಂದಿಗೆ 1

ಆಶಾಪಾಶ ಬಹುಕ್ಲೇಶಂಗಳನೆ

ನಾಶ ಮಾಡುವುದೆಂದಿಗೊ ರಂಗಯ್ಯ

ವಾಸುದೇವನೆ ನಿಮ್ಮ ಪಾದಾರವಿಂದದೊಳು

ವಾಸವಾಗುವದೆಂದಿಗೊ 2

ಸುಖದುಃಖಮಾನಾಪಮಾನಂಗಳ್ನೆಲ್ಲಾ

ನಮವ ಮಾಡುವದೆಂದಿಗೊ ರಂಗಯ್ಯ

ಲಾಭಾಲಾಭವು ಶೀತೋಷ್ಣಂಗಳ

ಸಮವ ಮಾಡುವುದೆಂದಿಗೊ 3

ಕೆಟ್ಟನುಡಿಯು ನಿಷ್ಟುರವಾಕ್ಯಂಗಳ

ಬಿಟ್ಟುಬಿಡುವದೆಂದಿಗೊ ರಂಗಯ್ಯ

ಕೃಷ್ಣಮೂರುತಿ ನಿಮ್ಮ ಪುಟ್ಟ ಪಾದದೊಳೆನ್ನ

ತಟ್ಟನೆ ಸೇರಿಸಯ್ಯ 4

ಘೋರಸಂಸಾರಸಾಗರವ ದಾಟುವುದಕ್ಕೆ

ದಾರಿ ತೋರಿಸೋ ಎನಗೆ ರಂಗಯ್ಯ

ಶ್ರೀ ಶ್ರೀನಿವಾಸನೇ ನಿಮ್ಮಪಾದಾರವಿಂದದಾ

ಭಕ್ತಿನಾಮವನು ಕೊಡಿಸಯ್ಯ 5

****