ಹರಿಹರಿ ದಯವಾಗೊ ರಮಾಧವ ankita krishna vittala

 ರಾಗ - : ತಾಳ -

ಹರಿಹರಿ ದಯವಾಗೊ ರಮಾಧವ ಶ್ರೀ l

ಹರಿ ದಯವಾಗೊ ಭವ l

ಶರಧಿಯೊಳ್ಪರಿಪರಿ ನೊಂದೆ l

ಪಾರಗೈಸೊ ಪಾರಾಶರ ಸುತನೆ ll ಪ ll

ರಾಮಕೃಷ್ಣ ವ್ಯಾಸಾ ನಿಮ್ಮ ನಾಮ ಭಜಕ ದಾಸಾ l

ಕಾಮಿತ ಫಲಲೇಶಾ ಕೊಡದೆ ಕಾಡುವಿ ಸರ್ವೇಶಾ l

ಪ್ರೇಮವೇನೊ ಸುಖಧಾಮ ನೀನೀ ಪರಿ l

ಪಾಮರಿಂದ್ಯೆನ್ನ ಪಳಿಸುವಿ ದೇವಾ ll 1 ll

ಅಲ್ಲು ನೀನೆ ಇರುವಿ ಯನ್ನಲ್ಲಿದ್ದು ಯಾಕೆ ಮರೆವಿ l

ಬಲ್ಲಿದ ನೆನಿಸುವಿ ಕ್ಷುಲ್ಲಕರಿಂದಲಿ ದಣಿಸುವಿ l

ಸಲ್ಲುವದೆ ನಿನಗಿದೆ ಉಚಿತಾದರೆ l

ಕೊಲ್ಲೊ ಬ್ಯಾಗ ಮಾವಲ್ಲಭ ಮೂರ್ತಿ ll 2 ll

ನಾನು ಯಂಬೊ ಸೊಲ್ಲಾ ತನ್ನ ಕಾಣದೆ ಬಿಡದಲ್ಲಾ l

ಮನದಾಸೆಗೆ ಮಿತಿಯಿಲ್ಲಾ ನೀನರಿಯದ ಮಾತಿದರೊಳಿಲ್ಲಾ l

ಯೇನು ಹೇಳಲೊ ಯನ್ನ ಭವಣಿಯು l

ಮೀನ ಮರಿಯಂತ ಮರಗುವೆ ನಲ್ಲೊ ll 3 ll

ಕರುಣ ಬರದೆ ನಿನಗೆ ಈ ಹರಣಕ ಸುಖ ಲೇಶವಿಲ್ಲ ಈಗ l

ಮರಣವೆ ಸುಖಯನಗೆ ಕರಿಕರಿ ಭವ ತೊಲಗಿಸು ಬ್ಯಾಗ l

ಚರಣಕ್ಕೆರಗುವೆನೊ ಸಿರಿವರ ಶ್ರೀ ಹರಿ l

ಬರದೆ ತಡಿಯದಿರು ಭಕ್ತರ ಧೊರಿಯೆ ll 4 ll

ಎಷ್ಟು ಹೇಳಲಯ್ಯಾ ಈ ಕಷ್ಟವ ನೀಬಂದು ಬಿಡಿಸೊ ಜೀಯ್ಯಾ l

ಕೃಷ್ಣವಿಟ್ಠಲರಾಯಾ ಇಷ್ಟರೊಳ್ಸಂತುಷ್ಟನಾಗಿ ಕೈಯಾ l

ಘಟ್ಯಾಗ್ಹಿಡಿದರ ಬಿಟ್ಹೋಯಿತು ಶ್ರಮ l

ಬಟ್ಟದ್ದೆಲ್ಲ ಸಾರ್ಥಕಯಿಂದಿಗೆ ll 5 ll

***