ಹರಿ ಭಕುತಿವುಳ್ಳವರ ಶರೀರವೇ ಕುರುಕ್ಷೇತ್ರ purandara vittala

 ಹರಿ ಭಕುತಿವುಳ್ಳವರ ಶರೀರವೇ ಕುರುಕ್ಷೇತ್ರ ll ಪ ll

ಇವರು ನರರೆಂದು ಬಗೆವವರೆ ನರಕವಾಸಿಗಳು ll ಅ ಪ ll

ಸದಮಲನ ಧ್ಯಾನಿಸುವ ಹೃದಯ ಕಾಶಿಪುರವು l

ಮಧುವೈರಿವಲಿದ ಮನ ಮನಿಕರ್ಣಿಕ l

ಪದುಮನಾಭನ ಪೊಗಳುವ ಮನವಯೋಧ್ಯಾಪುರಿ l

ವದನ ವೈಕುಂಠಪುರವಾಗಿ ತೋರುವದು ll 1 ll

ನರಹರಿಯನೀಕ್ಷಿಸುವ ನಯನ ದ್ವಾರಾವತಿಯು l

ಮುರಹರನನಿರ್ಮಾಲ್ಯ ಘ್ರಾಣಿಸುವ ಮೂಗು ಮಥುರೆ l

ಕರುಣಾಕರನ ಕಥೆ ಕೇಳುವ ಕಿವಿ ಕೇದಾರ l

ಸಿರಿಧರಗೆ ಎರಗುವ ಶಿರವೇ ಬದರಿ ll 2 ll

ಚಕ್ರಧರಗೆ ಪೊಗುವಾ ಚರಣ ಮಾಯಾವತಿ l

ತ್ರಿವಿಕ್ರಮನ ಪೂಜಿಸುವ ಕರವೇ ಕಂಚಿ l

ದುಷ್ಕೃತಿಯ ಕಳೆವ ನಮ್ಮ ಪುರಂದರವಿಟ್ಠಲನ್ನ l

ಸುಕೃಪೆಯುಳ್ಳವರ ಅಂಗ ಸಾಯುಜ್ಯವು ll 3 ll

***