ಜಯ ಜಯಾ ಶ್ರೀವೆಂಕಟೇಶ ಜೀಯ ankita uragadrivasa vittala

 ರಾಗ - : ತಾಳ - 

ಜಯ ಜಯಾ ಶ್ರೀವೆಂಕಟೇಶ ಜೀಯ ll ಪ ll

ಜಯ ಶ್ರೀವೆಂಕಟೇಶಜೀಯ ನೀನೆ ಅ

ಭಯಪ್ರದಾಯಕನಯ್ಯ ll ಆಹಾ ll

ಭಯಕೃದ್ಭಯನಾಶನ ನೀ ಎನ್ನ ಕೈಬಿಡದೆ

ಕಾಯೊ ಎನ್ನೊಡೆಯನೆ ವೇಂಕಟರಾಯ ll ಅ ಪ ll

ಮಂಕುಮಾನವನಾದ ಎನ್ನ ಮನದ

ಡೊಂಕು ತಿದ್ಧಿದಿ ಸ್ವಪನವನ್ನ ನಿನ್ನ

ಅಂಕಿತದಂತೆ ನುಡಿಸೆನ್ನ ಇನ್ನು

ಮಂಕುಹರಿಸಿದೆ ಪ್ರಸನ್ನ ll ಆಹಾ ll

ಬಿಂಕದಿಂದ ಇಹ ಶಂಕೆ ಹರಿಸಿ ನಿನ್ನ

ಕಿಂಕರ ಕಿಂಕರ ಕಿಂಕರನೆನಿಸಿದೆ ll 1 ll

ಹಿಂದನೇಕ ಪರಿಯಿಂದ ಮನ

ಬಂದಂತೆ ನುಡಿಸಿದ್ದರಿಂದ ತಂದೆ

ಮುದ್ದು ಮೋಹನ ವಿಟ್ಠಲಾನಂದ ಪೊಂದಿ

ಸಂದೇಹ ಹರಿಸಿದ ಚಂದ ll ಆಹಾ ll

ಇಂದು ಮುಂದು ಎಂದೆಂದಿಗೂ ನೀ ಭವ

ಬಂಧ ಹರಿಸಿ ಕಾಯಬೇಕು ಇಂದಿರಾರಮಣ ll 2 ll

ತ್ವರಿತಾದಿ ದಯಮಾಡೋ ಹರಿಯೆ ನೀನೆ

ನಿರುತ ಎನ್ನಯ ಕುಲದ ದೊರೆಯೇ ಭಕ್ತ

ಪರಿಪಾಲ ಮೋಕ್ಷದ ಹರಿಯೇ ನಿನ್ನ

ಹೊರತು ರಕ್ಷಕರ ನಾನರಿಯೆ ll ಆಹಾ ll

ಪರಮಕರುಣಿ ಶ್ರೀ ವೆಂಕಟೇಶಾಭಿನ್ನ 

ಉರಗಾದ್ರಿವಾಸವಿಟ್ಠಲ ಜಗದೀಶನೆ ll 3 ll

***