ಆನೆ ಬಂದಿದೆ ಮುದ್ದಾನೆ ಗೋಪಿದೇವಿಯ ankita varadadikeshava

ಆನೆ ಬಂದಿದೆ ಮುದ್ದಾನೆ ಗೋಪಿದೇವಿಯ l

ಗೃಹದೊಳಾಡುವ ಮರಿಯಾನೆ ll ಪ ll

ದೇವಕಿಯೊಳು ಪುಟ್ಟಿದಾನೆ ವಸು l

ದೇವನ ಬಳಿಯೊಳು ನಲಿದಾಡುತಾನೆ l

ಶ್ರೀ ವಾಸುದೇವನೆಂಬಾನೆ l

ಭಾವಿ ಬ್ರಹ್ಮಾದ್ಯಮರರು ಪೂಜಿಪ ಪಟ್ಟದಾನೆ ll 1 ll

ಪೂತನಿ ಅಸು ಹೀರಿದಾನೆ ಕಡು l

ಘಾತಕ ಶಕಟನ ಕಾಲಿಲೊದ್ದಾನೆ l

ವತ್ಸಾಸುರನ ಕೊಂದಾನೆ ಕೃಷ್ಣ l

ತೆತ್ತಿಸ ಗೋಪೇರ ವಡನಾಡಿದಾನೆ ll 2 ll

ಕಾಡಕಿಚ್ಚನು ನುಂಗಿದಾನೆ ಕೃಷ್ಣ l

ಕಡಹದ ಮರವನೇರಿ ಮಡುವು ಧುಮುಕಿದಾನೆ l

ಜೋಡಿಯಿಲ್ಲದೆ ಹೆಚ್ಚಿದಾನೆ ರಂಗ l

ಪೊಡವಿ ಗೋವಳರನ್ನು ಕಾಪಾಡಿದಾನೆ ll 3 ll

ಅಕ್ರೂರನೊಡನೆ ಬಂದಾನೆ ಮದ l

ಸೊಕ್ಕಿ ಬರುವ ಜಟ್ಟಿಯ ಮುರಿದಾನೆ l

ಡೊಂಕು ಕುಬ್ಜೆಗೆ ತಿದ್ದಿದಾನೆ ಮಾವ l

ಕಂಸನ ಕೊಂದು ತಾತನ ಪೊರೆದಾನೆ ll 4 ll

ತರುಳೆ ರುಕ್ಮಿಣಿಯ ತಂದಾನೆ ಬಹು l

ಕರುಣದಿ ಪಾಂಡವರನ್ನು ಕಾಯ್ದಾನೆ l

ವರವೇಲಾಪುರದಲಿಪ್ಪಾನೆ ರಂಗ l

ವರದಾದಿಕೇಶವನೆಂಬುವ ತಾನೆ ll 5 ll

***