ಬಾ ಹರಿ ಭಕುತರ ಭಯ ಪರಿಹರಿಸುತ ankita kamalanabha vittala

 .ರಾಗ –  :  ತಾಳ –

ಬಾ ಹರಿ ಭಕುತರ ಭಯ ಪರಿಹರಿಸುತ

ಸರಸಿಜ ಸದನೆಯೊರಡಗೂಡಿ ನಲಿಯುತ ll ಪ ll

ನೀರೊಳು ಮುಳುಗಿ ಮೀನನೆಂದೆನಿಸಿ 

ಭಾರವ ಪೊತ್ತಿಹ ಕೂರ್ಮನೆ ಜವದಿ ll 1 ll

ಕೋರೆಗಳಿಂದ ಧಾರುಣಿತಂದ 

ಕ್ರೂರನುದರ ಕರುಳ್ಹಾರವೆ ಚಂದ ll 2 ll 

ಮೂರಡಿ ಭೂಮಿಯ ಬೇಡುತ ಬಂದೆ 

ನಾಡೊಳು ಕೊಡಲಿಯ ಪಿಡಿಯುತ ನಿಂದೆ ll 3 ll

ಸೇತುವೆ ಕಟ್ಟುತ ಸೀತೆಯ ತಂದೆ

ಪಾತಕಿ ಕಂಸನ ನಾಶವ ಗೈದೆ ll 4 ll 

ಬುದ್ಧನೆಂದೆನಿಸಿದೆ ಶುದ್ಧಮೂರುತಿಯ 

ಮುದ್ದು ತೇಜಿಯ ನೇರುತ ಮೆರೆದವನೆ ll 5 ll

ಬಾ ಮುರವೈರಿ ಬಾ ಬಾರೊ ಶೌರಿ

ಭಾಸುರ ವಂದ್ಯ ಬಾ ಮುದದಿಂದ ll 6 ll 

ಬಿಡದೆ ನಿನ್ನಯ ಪಾದ ದೃಢದಿ ಭಜಿಪೆನೈ

ಕಡಲ ಶಯನ ಕಮಲನಾಭವಿಟ್ಠಲನೆ ll 7 ll

***