ವಂದಿಸುವೆ ಸರ್ವದಾ ಸುಂದರ ಗುರು ರಾಘವೇಂದ್ರ ankita narahari vittala

 ankita ನರಹರಿವಿಠಲ

ರಾಗ: ಭೂಪ ತಾಳ: ಝಂಪೆ

ವಂದಿಸುವೆ ಸರ್ವದಾ ಸುಂದರ ಗುರು ರಾಘ-

ವೇಂದ್ರ ನಿಮ್ಮಯ ಪಾದವ

ಮಂದಮತಿನಾನಹುದು ತಂದೆ ಸಲಹುವನೆಂ-

ತೆಂದು ನಂಬಿರುವೆ ನಿಜವಾ ದೇವ ಪ

ಬೇಡಿಕೊಂಬೆನು ನಿನ್ನ ಮೂಢನಿವನೆಂದು

ಬೀಸಾಡದಿರು ಭವಶರಧಿಯೊಳು

ಬೇಡಿದ್ದು ಕೊಡುವ ಪ್ರಭು ನೀನಿರಲು ಅನ್ಯರ

ಕಾಡಲಾರೆ ಧರೆಯೊಳು

ಜೋಡಿಸುವೆ ಕರಯುಗ್ಮ

ನೋಡು ನೀ ದಯದಿಂದ ಕೂಡಿಸು ಭಕ್ತರೊಳು

ರೂಢಿಯೊಳು ನಿನ್ಹೊರತು ಕಾಪಾಡಿ ಕಾಯ್ವರ ಕಾಣೆ

ಮೋದಮತ ಕುಮುದಚಂದ್ರ ಗುಣಸಾಂದ್ರ 1

ಮಡದಿಮಕ್ಕಳ ಮೋಹ ಕಡಲಗೊಡಿಯನೆನಿಸಿ

ಒಡಲ ಕ್ಷುಧೆ ತೃಷೆ ಸಹಿಸಿದೆ

ಕಡುದುರಾತ್ಮರ ಬಳಿಯ ಕರ

ಒಡ್ಡಿ ಬಾಯ್ದೆರೆದು ಭಿಡೆಯಿಲ್ಲದಲೆ ಬೇಡಿದೆ

ಕೊಡಹಾಲು ಕೊಡುವಂಥ ಸುರಧೇನು ಇರಲಿನ್ನು ಬ-

ರಡಾವು ನಾ ಬಯಸಿದೆ ಪೊಡವಿಸುರ-

ರೊಡಿಯ ಪಾಲ್ಗಡಲಶಯನನ ನಾಮ

ನುಡಿಸು ನೀ ನಿರಂತರದೊಳು ಪ್ರಭುವೆ 2

ಶಿಷ್ಟಜನಪಾಲ ಗುರುಶ್ರೇಷ್ಠ ನಿಮ್ಮಯ ಮಹಿಮೆ

ಇಷ್ಟೆ ಎಂದ್ಹೇಳಲೊಶವೆ ಜನ ನಿಷ್ಟೆಯಿಂದಲಿ ಶತ

ಅಷ್ಟೋತ್ತರಾ ಜಪಿಸೆ ಮನೋ-

ಭೀಷ್ಟೆಯನು ಪೂರೈಸುವೆ

ಕುಷ್ಟರೋಗಾದಿಗಳು ನಷ್ಟಗೊಳಿಸಿ ಮಹೋ-

ತ್ಕøಷ್ಟಭೀಷ್ಟಜಾನೆನಿಸುವೆ

ಧಿಟ್ಟ ಶ್ರೀನರಹರಿವಿಠಲನ ಸಿಟ್ಟಿಳಿಸಿ

ಪುಟ್ಟಪ್ರಹ್ಲಾದರಾಯಾ ಧೊರಿಯಾ 3

***