ಭಾರತೀ ಪಾಲಿಸು ನಿತ್ಯ ankita gurujagannatha vittala

 ..

ಭಾರತಿ ಪಾಲಿಸು ನಿತ್ಯ ಪ

ಭಾರತಿ ಭಾಸ್ವರಕಾಂತೆ ನಿನ್ನ

ಸಾರುವೆ ಸತತ ನಿಶ್ಚಿಂತೆ ಆಹಾ

ವಾರಿಜಸಮಪಾದ ತೋರಿಸು ಮಮ ಸುಹೃ -

ನ್ನೀರಜದೊಳು ನಿತ್ಯ ಗಾರುಮಾಡದೆ ಜನನಿ ಅ.ಪ

ಹರಿಯ ಪಟ್ಟದ ನಿಜರಾಣಿ ಎನಗೆ

ಹರಿಯ ತೋರಿಸೆ ಹೇ ಕಲ್ಯಾಣಿ ನಿನಗೆ

ಶರಣೆಂಬೆ ಕಾಲಾಹಿವೇಣಿ ಪರಮ

ಕರುಣಿಯೆ ಕೋಕಿಲವಾಣಿ ಆಹಾ

ಹರಿಹರಾದ್ಯನಿಮಿಷ ಕರಕಮಲಪೂಜಿತೆ

ವರಭಾಗವತರಗ್ರೇಸಳೆಂದು ನಮಿಸುವೆ 1

ಮೂರೇಳು ತತ್ತ್ವಾಭಿಮಾನಿ ಎನಿಸಿ

ಮೂರಾರು ಭಕುತಿಯಿಂದಲಿ ನೀ ಸತತ

ಮೂರು ಜೀವರೊಳು ಪ್ರೇರಣಿಯಾಗಿ

ಮೂರೊಂದು ಮೊಗನ ಕಲ್ಯಾಣಿ ಆಹಾ

ಮೂರು ಬಗೆಯ ಜನಕೆ ಮೂರು ವಿಧದಿ ಗತಿ

ಮೂರು ಕಾಲಕೆ ಇತ್ತು ಮೂರುಮಾಡುವಿ ದೇವಿ 2

ಮಾತರಿಶ್ವನ ಪಾದಕಮಲ ಯುಗಕೆ

ನೀತಷಟ್ಟದಳೆ ನಿರ್ಮಲ ಮನಸು

ಆತುರದಲಿ ಮಾಡು ವಿಮಲೆ ನಮಿಪೆ

ಕಾತರಭವಶ್ರಮಶಮಲಾ ಆಹಾ

ಜಾತರೂಪೋದರತಾತ ಶ್ರೀ ಗುರುಜಗ -

ನ್ನಾಥವಿಠಲಗೆ ನೀ ದೂತನೆನಿಸು ಎನ್ನ 3

***