ಬಾಲಗೋಪಾಲ ಸುಶೀಲ ಸಜ್ಜನ ಪಾಲ ankita kamalanabha vittala

 ರಾಗ - : ತಾಳ - 

ಬಾಲಗೋಪಾಲ ಸುಶೀಲ ಸಜ್ಜನ ಪಾಲ ll ಪ ll

ಶ್ರೀಲೋಲ ಗುಣಶೀಲ ಶ್ರೀ ತುಳಸಿಯಮಾಲ

ಶ್ರೀ ಲಕುಮಿಯ ಲೋಲ ಬಾಲ ಸುರಮುನಿ ಪಾಲ ll ಅ ಪ ll

ಕಂದರಿಲ್ಲದ ಬಹುನಿಂದ್ಯದ ಜನುಮವ

ಪೊಂದಿದೆ ವ್ಯರ್ಥದಿ ಇಂದಿರೆ ರಮಣನೆ ll 1 ll

ಬಾಲಲೀಲೆಗಳಿಂದ ಬಾಲಹಾಡುತಲಿರೆ

ಲಾಲಿಸಿ ಹರುಷಿಪ ಕಾಲಕಾಣೆನೊ ದೇವ ll 2 ll

ಅಂಬೆಗಾಲಿಕ್ಕುತ ಕಂದರಾಡುತ ಬರೆ

ಚಂದದಿಂದೆತ್ತುವಾನಂದವಿಲ್ಲವೋ ದೇವ ll 3 ll

ಕಡಗಗಗ್ಗರಿಗೆಜ್ಜೆ ಘಲುರೆಂಬೊನಾದದ

ಧ್ವನಿ ಕೇಳದ್ಹೋದ ಈ ಕಿವಿಗಳು ವ್ಯರ್ಥವು ll 4 ll

ಪಾಂಡುರಂಗನೆ ನಿನ್ನ ನಂಬಿ ನಾ ಸ್ತುತಿಸುವೆ

ನಿಂದೆಯ ಕಳದೆನ್ನ ಚಂದದಿಂ ಪಾಲಿಸೊ ll 5 ll

ಶ್ರೀಶ ಶ್ರೀಮಾಧವ ಕೂಸಿನ ಪಾಲಿಸಿ

ದಾಸಿಯ ಮನದಾಸೆ ನೀ ಸಲಿಸೈ ದೇವ ll 6 ll

ಬಾಲಕನಾದರೆ ಆಳನುಮಾಡುವೆ

ಬಾಲಕಿಯಾದರೆ ಧಾರೆಯನೆರೆಯುವೆ ll 7 ll

ಸಾಸಿರ ನಾಮನೆ ಭೂಸುರ ಪಾಲನೆ

ಕ್ಲೇಶ ನಾಶಕ ಕೃಷ್ಣ ನಾ ಶಿರಬಾಗುವೆ ll 8 ll

ಕಮಲನಾಭವಿಟ್ಠಲ ನಮಿಸಿ ಬೇಡುವೆ ನಿನ್ನ

ಶ್ರಮವ ಪರಿಹರಿಸೆನ್ನ ಭ್ರಮೆಯ ತಪ್ಪಿಸೋದೇವ ll 9 ll

***