ಗಂಗೆ ಭಾಗೀರಥೀ ಮಂಗಳಾಂಗಿ ಅಳಕನಂದನ ankita bheemesha krishna GANGE BHAAGEERATHI MANGALAANGI ALAKANANDANA

ಗಂಗಾ (ಗಂಗೆ) ಭಾಗೀರಥೀ ಮಂಗಳಾಂಗಿ ಅಳಕನಂದನ ನೀ ಮಹಾ

ಸುಂದರಾಂಗಿ ಸಿಂಧುರಾಜನ ರಾಣಿ ಸಿರಿಯು

ಸಂಪತ್ತು ಕೊಡು ಕಂಗಳಿಂದಲಿ ನೋಡಿ ಕರುಣಿಸೆನ್ನ ಪ

ಕಾಶಿ ಪಟ್ಟಣದಲಿ ವಾಸವಾಗಿ ಸರಸ್ವತಿಯನು ಕೂಡಿ

ನೀ ಸರಸವಾಗಿ ಸೋಸಿಲಿಂದಲಿ

ಸೂರ್ಯಪುತ್ರಿ ಯಮುನೆಯನು ಕೂಡಿ ಉ-

ಲ್ಲಾಸದಿದ್ಹರಿದು ವಾರ್ಣಾಸಿಗ್ಹೋಗಿ 1

ಹಾಲಿನಂತೆ ಹರಿವೊ ಗಂಗೆ ನೀನು

ನೀಲದಂತಿದ್ದ ಯಮುನೆಯನು ಕೂಡಿ

ಲೀಲೆಯಿಂದಲಿ ಸರಸ್ವತಿಯನು ಕೂಡಿ

ಓಲ್ಯಾಡುತ ಬಂದೆ ಒಯ್ಯಾರದಿಂದ 2

ಭಗೀರಥನ ಹಿಂದೆ ನೀ ಬಂದೆ ಓಡಿ

ಸಗರನ ಸುತರ ಉದ್ಧಾರ ಮಾಡಿ

ಜಗವ ಪಾವನ ಮಾಡೋ ಜಾಹ್ನವಿಯೆ ನೀ ಎನ್ನ

ಮಗುವೆಂದು ಮುಂದಕೆ ಕರೆಯೆ ತಾಯಿ 3

ಬಿಂದುಮಾಧವ ವೇಣುಮಾಧವನ್ನ ಆ-

ನಂದ ಭೈರವ ಕಾಳ ಭೈರವನ್ನ

ಚಂದದಿಂದ್ವಿಶ್ವನಾಥನ್ನ ಗುಡಿಮುಂದೆ

ಹೊಂದಿ ಹರಿದ್ಹನುಮಂತ ಘಾಟಿನ್ಹಿಂದೆ 4

ಧಡಧಡನೆ ಬಂದು ದಡಗಳನು ಕೊರೆದು

ಪೊಡವಿ ಮ್ಯಾಲಿಂಥ ಸಡಗರದಿ ಹರಿದು

ಕಡಲಶಯನನ್ನ ಕಾಲುಂಗುಷ್ಠದ ಮಗಳು

ಕಡಲರಾಣಿಯೆ ಕಯ್ಯ ಪಿಡಿಯೆ ನೀನು 5

ಮರದ ಬಾಗಿಣ ಕುಂಕುಮರಿಷಿಣವು ಗಂಧ

ಪರಿಪರಿಯಿಂದ ಪೂಜೆಯಗೊಂಬುವಿ

ಸ್ಥಿರವಾದ ಮುತ್ತೈದೆತನ ಜನುಮ ಜನುಮಕ್ಕು

ವರವ ಕೊಟ್ಟು ವೈಕುಂಠವನು ತೋರಿಸೆ 6

ಮಧ್ಯಾಹ್ನದಲಿ ಮಲಕರ್ಣಿಕೆಯ ಸ್ನಾನ

ಶುದ್ಧವಾಗಿ ಪಂಚಗಂಗೆಯಲಿ

ಅದ್ದಿದ ದೇಹ ಪವಿತ್ರವನು ಮಾಡಿ ಭವ ಸ-

ಮುದ್ರವನು ದಾಟಿಸೆ ಭಾಗೀರಥಿ 7

ಎಷ್ಟು ಜನ್ಮದ ಸುಕೃತ ಒದಗಿತೆಂದು ಗಂಗ

ಭೆÀಟ್ಟಿಯಾಗೊ ಪುಣ್ಯ ಬಂದಿತಿಂದು

ಚಕ್ರತೀರ್ಥದ ಸ್ನಾನ ಸಂಕಲ್ಪದ ಫಲವ

ಕೊಟ್ಟು ರಕ್ಷಿಸು ತಾಯಿ ತರಂಗಿಣಿ 8

ಸಾಸಿರ ಮುಖದಿ ಶರಧಿಯನು ಕೂಡಿ

ಹೋಗಿ ಬಾ ಊರಿಗೆ ಭಕ್ತಿಮುಕ್ತಿ ನೀಡಿ

ನೀನು ಭೀಮೇಶ ಕೃಷ್ಣನಲಿ ಹುಟ್ಟಿದ್ದು

ಪಾದವನು ತೋರೆನ್ನ ಪೊರೆಯಬೇಕೆ 9

****