ನೋಡ್ ನೋಡಾ ಶ್ರೀಹರಿ ತಾನೆಂಥ ಚೆಲುವ purandara vittala

 ನೋಡ್ ನೋಡಾ ಶ್ರೀಹರಿ ತಾನೆಂಥ ಚೆಲುವ ನೋಡಾ l

ನೋಡ್ ನೋಡಾ ರುಕ್ಮಿಣೀ ಅರಸೆಂಥ ಚೆಲುವ ನೋಡಾ l

ನೋಡ್ ನೋಡಾ ಗೋಪಾಲಕೃಷ್ಣ ಎಂಥ ಚೆಲುವ ನೋಡಾ ll ಪ ll

ಕಾಲಿನಲ್ಲಿ ಗೆಜ್ಜೆ ನೋಡಾ l ಮೇಲೆ ಪ್ಪೈಜಣ ಸರಪಳಿ ನೋಡಾ l

ಉಂಗುಷ್ಟದಲ್ಲಿ ಗಂಗೆಯ ಪಡೆದ ಮಂಗಳಾತ್ಮಕ ರಂಗನ ನೋಡಾ ll 1 ll

ವಜ್ರದ ಕಿರೀಟ ನೋಡ l ಕರ್ಣಕುಂಡಲವ ನೋಡ l

ಚಿನ್ನದ ಕೊಳಲನೂದುವಂಥ ಸಣ್ಣ ಬಾಲಕೃಷ್ಣನ ನೋಡಾ ll 2 ll

ವಕ್ಷಸ್ಥಳದಿ ಲಕ್ಷ್ಮೀನೋಡ l ವೈಜಯಂತಿ ಮಾಲೆಯ ನೋಡ l

ಹೊಕ್ಕಳಿಂದ ಬ್ರಹ್ಮನ ಪಡೆದ ಸುಂದರಾತ್ಮಕ ಕೃಷ್ಣನ ನೋಡಾ ll 3 ll

ಕಂದನ ಮೊರೆಯ ಕೇಳಿ ಕಂಭದಿಂದ ಒಡೆದು ಬಂದ l

ಹಿರಣ್ಯಕಶ್ಯಪನ ಒಡಲ ಸೀಳಿ ಕರುಳಮಾಲೆ ಧರಿಸಿದ ನೋಡಾ ll 4 ll

ಕರಿಯರಾಜನ ಮೊರೆಯ ಕೇಳಿ ಚಕ್ರದಿಂದ ನಕ್ರನ ಸೀಳಿ l

ಪುರಂದರವಿಟ್ಠಲನಾಗಿ ತಾನು ಗಿರಿಯ ಮೇಲೆ ನಿಂತ ನೋಡಾ ll 5 ll

***