ಅಜಭವಾದಿಗಳೊಡೆಯ ಸುಜನರ ಪೊರೆವ rukmini krishna nandana AJA BHAVAADIGALODEYA SUJANARA POREVA

ಅಜ  ಭವಾದಿಗಳೊಡೆಯ  ಸುಜನರ ಪೊರೆವ |
 ನಿಜದಲ್ಲಿ ಭಕ್ತ ರಕ್ಷಕ ಗಜ ವರದ ||ಪ ||

 ಅಜಮಿಳನು ಸಾವಿನಂಚಿನಲಿ  ಕರೆದರು ಬಂದು|
 ಸರಸಿಜ ದಳ ನೇತ್ರ ಸಲಹಿದೆಯೊ ಭಜಕ ಜನ ಪ್ರಿಯ||ಅಪ ||

 ಕಾಲ ಕರ್ಮ ಕೂಡಿಬಂದು ತಾಯಿಯ ಗರ್ಭದಿ ಜನಿಸಿ ಬಂದೆ|
 ಕಾಲು ಕೈಯ ಚಲಿಸಲಾರದೆ ಯಾತನ ಸಹಿತ ನಾಗಿ||
 ಕಾಲ ನವಮಾಸ ಕಳೆದೆನೋ ಹರಿಯೇ|
 ಸಕಲಕ್ಕೆ ನೀನೇ ಕಾರಣ ಎಂಬುದ ಅರಿಯದೆ ಮೂರ್ಛೆಯಲಿ ಕಳೆದೆ||1||

 ತಾಯಿಯ ಉದರದಿಂದ ಹೊರ ಬಂದೆ ರೋದಿಸುತ|
 ಬಾಯಿಯಲ್ಲಿ ಅಕ್ಕರೆಯ ಮೊಲೆ ಹಾಲು ಹೀರುತ ಬೆಳೆದೆ||
 ಮಾಯೆ ಆವರಿಸೆ ಬಾಲ್ಯ ಕಳೆಯಿತು ಆಟ ಪಾಠಗಳಲ್ಲಿ|
 ಕಾಯ ಬಲಿಯಿತು ಯೌವ್ವನದ ಮದದಲಿ ||2||

 ಅಂಗನೆಯ ವಡನಾಟ ಕಾಮ ಕೂಟದಲಿ| ಸಂದಿತು ಪ್ರಾಯ-
 ಅನಂಗನ ಅಧಿಪತ್ಯದಲ್ಲಿ ಕಳೆಯಿತು ಅರ್ಧಾಯುಷ್ಯ ಇನ್ನು||
 ಹಿಂಗದೆ ಹೋಯಿತು ಜೀವನದ ಆಸೆ|
 ಮಂಗನಂತಿದೆ ಮನವಿನ್ನು ಸತ್ಸಂಗಕ್ಕೆ ಎಳಸಲಿಲ್ಲವೋ ||3||

 ನವದ್ವಾರ ಪುರವೀ ದೇಹ ಜೀರ್ಣ ಆಗಿಹುದು|
 ಜೀವನವನ್ನೆಲ್ಲ ಮೋಜಿನಲ್ಲಿ ಕಳೆಯದೆ||
 ಯಾವ ಕ್ಷಣದಲೂ ನಿನ್ನ ಸೇವಿಸಿದ ನೆನಪಿಲ್ಲ|
 ಜೀವ ತತ್ತರಿಸಿಹುದು ಯಮನ ಭಯಕೆ ||4||

 ಸಂಸಾರ ಚಕ್ರದಲ್ಲಿ ತಿರುಗಣೆಯ ಮಡುವಿನಲ್ಲಿ ಇನ್ನೆಷ್ಟು ಜನ್ಮವೋ ತಿಳಿಯೆ|
ಹಿಂಸೆಯಾಗುತಲಿಹುದು ಹೊರಬರುವ ದಾರಿ ಕಾಣದೆ||
 ಹಂಸನಾಮಕ ನೀನು ಸಂಚಿತ ಆಗಾಮಿ ಪ್ರಾರಬ್ಧವ ಕಳೆದು|
 ಕಂಸಾರಿ ನಿನ್ನಯ ಪುರದಲ್ಲಿ ರುಕ್ಮಿಣಿ- ಕೃಷ್ಣ ನಂದನನ ಇರಿಸು ನಿರಂತರ||5||
*******


 ಪಲ್ಲವಿ: ಅಜ ಭವಾದಿಗಳೊಡೆಯ  ಸುಜನರ ಪೊರೆವಾ.
 ರಚನೆ: ಗುರುರಾಜ ಚಿಟಗುಪ್ಪಿ - ಧಾರವಾಡ
 ರಾಗ: ಕೇದಾರ
 ಸ್ವರ ಸಂಯೋಜನೆ: ಗುರುರಾಜ ಚಿಟಗುಪ್ಪಿ.
 ಅಂಕಿತ: ರುಕ್ಮಿಣಿ- ಕೃಷ್ಣ ನಂದನ.