ನೀ ದಯಮಾಳ್ಪವ ನಿರ್ದಯನಾದರೆ ankita krishnavittala

ನೀ ದಯಮಾಳ್ಪವ ನಿರ್ದಯನಾದರೆ

ಯಾರಿಗೆ ಮೊರೆ ಇಡಲೋ ಗುರುರಾಜ ಪ

ಪಾಪಿಜನರ ಸೇರಿ ಪಾಪಕಾರ್ಯವಗೈದು

ತಾಪಪಡುತಲಿಹೆ ಪೊರೆವರ ಕಾಣೆನು

ತಾಪಸೋತ್ತಮ ತಂದೆ ಕೋಪವ ಮಾಡದೆ

ಪಾಪಕೂಪದಿಂದೆನ್ನನುದ್ಧರಿಸಿಕಾಯೋ 1

ಅತಿಹೀನ ನಾನೆಂದು ಖತಿಯನಾಂತೆಯ ತಂದೆ

ಮತಿಹೀನ ನಾನೆಂದು ನಿರ್ದಯನಾದೆಯ

ಪತಿತಪಾವನನಾದ ಯತಿಕುಲತಿಲಕನೆ

ಪತಿಕರಿಸಿ ಎನ್ನ ಕಾಯೋ ರಾಘವೇಂದ್ರ 2

ಭವದಬಾಳು ಇದು ಭಾವಿಸಿನೋಡಲು

ಕವಿದ ಮಂಜಿನತೆರದಿ ಕ್ಷಣಿಕವಲ್ಲವೆ ಸ್ವಾಮಿ

ಭವರೋಗಹರ ನಮ್ಮ ಕೃಷ್ಣವಿಠಲನ ಸರಿ

ಭುವನದೊಳಗೆ ಕಾಣೆ ಕರುಣಿ ರಾಘವೇಂದ್ರ 3

***

 ರಾಗ: ಶಹನ ತಾಳ: ಝಂಪೆ (raga tala may differ in audio)