ಇಂಥಾ ಸೊಬಗ ಕಾಣೆನೋ ಈ ಧರೆಯೊಳಗಿಂಥಾ ಸೊಬಗ ಕಾಣೆನೋ ankita shreesha keshava vittala

 ..

kruti by shreesha keshava vittala dasaru (subbanna dasa)

ಇಂಥಾ ಸೊಬಗ ಕಾಣೆನೋ |

ಈ ಧರೆಯೊಳಗಿಂಥಾ ಸೊಬಗ ಕಾಣೆನೋ ಪ

ಕಂತುಪಿತ ತನ್ನ ಕಾಂತೇಯರೊಡಗೂಡಿ |

ನಿಂತು ಮಜ್ಜನಗೊಂಡು ಸಂತಸವಾಂತಪರಿಅ.ಪ

ನಂದಾವ್ರಜದಿ ಇಂದ್ರನೂ | ಕುಪಿತನಾಗಿ |

ಅಂಧವೃಷ್ಟಿಯ ಕರೆಯಲು | ಸಿಂಧೂಶಯನ ಗಿರಿಯ |

ಮಂದಹಾಸದಿ ನೆಗಹಿ | ಸುಂದರ ಗೋವ್ಗಳನೆ |

ಚೆಂದಾದಿಂದಲೆ ಪೊರೆಯೆ |

ಅಂದು ತೋರಿದುಪಕೃತಿಯ ನೆನೆದು ಗೋ | ವೃಂದಗಳೈ |

ತಂದಿಂದಿರೆಯರಸಗೆ |

ಮಿಂದು ಮಧುರಕ್ಷೀರಧಾರೆಯ ಕರೆಯಲು |

ನಂದಕುವರಾನಂದವ ಬೀರಿದ 1

ಕಿರಿಯರೊಡನೆ ಕೂಡುತ | ಗೋಪಾಲನು |

ಮುರಲಿನಾದವ ಗೈಯುತ | ಹರಿಣಾಕ್ಷಿಯರಮನೆ |

ಹರುಷದಿಂದಲೇ ಪೊಕ್ಕು | ಪರಿಪರಿ ಲೀಲೆಯಿಂ |

ಬೆರಗು ಮಾಡುತಲಿರೆ | ವರ ಧದಿಘೃತ ಭಾಂಡಗಳನೊಡೆದು |

ಯದುವರನಾಲೈಸುತ ಬರುವರ ಸುಳಿವನು |

ಸರಸದಿ ಕಂಡಾಕ್ಷಣದಿಂದೋಡಲು |

ಸುರಿದುದು ಶಿರದಲಿ ದಧೀಘೃತಧಾರೆಯು 2

ಕರುಣಾಸಾಗರ ಹರಿಯು | ಮೋಹದಿ ವರ |

ಭೈಷ್ಮಿಭಾಮೇರ ಕೂಡುತಾ | ಭರದಿ ಕುಣಿಯಲವರ

ಶಿರದಿ ಮುಡಿದ ಸುರಗೀ | ಅರಳುಮಲ್ಲಿಗೆಯೊಳು |

ಸೆರೆಬಿದ್ದ ಮಧುಪಗಳ | ನೆರೆದು ಝೇಂಕರಿಸುತ |

ಸಿರಿಯರಸನವರ | ಶಿರದೊಳು ಧರಿಸಿದ ಮಧುಧಾರೆಗಳು

ಹರುಷದಿ ಸುರಿಸಲು ಸುರ ಸಂದೋಹವು |

ಹರಿಮಹಿಮೆ ವೆಗ್ಗಳವೆನುತಾ ಪರಿ 3

ಅಂಗಳದೊಳು ಆಡುತ | ಮಂಗಳಮೂರ್ತಿ |

ಸಂಗಡಿಗರ ಸೇರುತಾ |

ಮುಂಗುರುಳ್ಗಳ ಮೇಲೆ | ಕೆಂದೂಳಿಯನೇ ಧರಿಸಿ |

ಕಂಗಳಿಂ ಕಂಡು ಗೋಪಿ ರಂಗನ್ನಪ್ಪಿದಳು ಮುದದೀ ||

ಅಂಗನೆ ರುಕ್ಮಿಣಿ ಭಂಗಿಯ ನೋಡಲು | ಅಂಗಜ

ಪಿತನನು | ಪಿಂಗದೆ ಬೇಡಲು | ಮಂಗಳಾಂಗಿ

ಮನದಿಷ್ಟವ ಸಲಿಸಲು | ಸಿಂಗರಗೊಂಡನು | ಸಕ್ಕರೆ ಸುರಿಸುತೆ 4

ಸುರನದೀ ಜನಕ ತಾನೂ | ಕುಂಜವನದಿ |

ಸರಸಿಜಾಕ್ಷೇರ ಕೂಡುತ |

ಸರಸವಾಡುತಲಿರೇ | ಪರಮ ಸಂತೋಷದಿ |

ತರುಲತೆಗಳು ಹರಿಯ ಚರಣ ಸೇವೆಯಗೈಯ್ದು |

ಸುರದ್ರುಮವೆಳನೀರನು ಸುರಿಸುತಲಿರೇ |

ಕದಳಿಗಳುದುರಿಸೆ | ಗಳಿತ ಫಲಂಗಳು |

ಸರಸಿಜನಾಭನು ಕರುಣಿಸಿ ಭಕುತರ |

ಶಿರಿಯಾಳಪುರದೊಳು ಮೆರೆದನು ವಿಭವದಿ 5

ವ್ಯಾಸರಾಜರ ಪೀಠದೀ | ರಂಜಿಪ ಲಕ್ಷ್ಮೀಶತೀರ್ಥರಿಂ ಸೇವಿಪ

ವ್ಯಾಸವರದ ರುಕ್ಮಿಣೀಶ ಕೃಷ್ಣನು ಭವ |

ಪರಿಪರಿ ನರಳುವ ದಾಸರ ಸಲಹಲಿನ್ನು |

ಸಾಸಿರ ಶಂಖದಿ ಪೂಜೆಯಗೊಳುತಿರೆ |

ಭೂಸುರರೆಲ್ಲರೂ ಘೋಷಿಸೆ ವೇದವ |

ದೇಶದೇಶದ ಜನರಾಲಿಸಿ ಬರುತಿರೆ |

ಶ್ರೀಶಕೇಶವ ತನ್ನ ಮಹಿಮೆಯ ತೋರಿದ 6

***