ಎಷ್ಟು ಸಂಪದವಮ್ಮ ದ್ವಾರಕೆ ankita ramesha

by  ಗಲಗಲಿ ಅವ್ವನವರು
ಎಷ್ಟು ಸಂಪದವಮ್ಮ ದ್ವಾರಕೆ
ಎಂದು ಸಂತುಷ್ಟನಾದನು ಬೊಮ್ಮ
ಕೃಷ್ಣನ ಹಾಡುತ ಪಾಡುತ
ಜನರೆಲ್ಲ ಉತ್ಕೃಷ್ಟರಾಗಿಹರಮ್ಮ ||ಪ||

ಪ್ಯಾಟಿಯ ಎದುರಾಗಿ ಕೋಟೆ
ಬಾಗಿಲ ಕೋಟಿ ಸೂರ್ಯರ ಬೆಳಕಿಲೆ
ಕೋಟಿ ಸೂರ್ಯರ ಬೆಳಕಿಲೆ ಹೊಳೆವಂಥ
ಹಾಟಕಾಂಬರನ ಅರಮನೆ ||೧||

ರನ್ನದ ಬಾಗಿಲು ಚಿನ್ನದ ಚೌಕಟ್ಟು
ಹೊನ್ನ ಕಳಸಗಳು ಹೊಳೆವೋವೆ
ಹೊನ್ನ ಕಳಸಗಳು ಹೊಳೆವೋವೆ
ಇದು ನಮ್ಮ ಪನ್ನಗ ಶಯನನ ಅರಮನೆ ||೨||

ಯೋಗಿಜನ ವಂದ್ಯ ಭಾಗವತಜನಪ್ರಿಯ
ಸಾಗರಶಯನನ ಅರಮನೆ
ಸಾಗರಶಯನನ ಅರಮನೆಯ ಬಾಗಿಲೊಳು
ಹೋಗಿ ಬರುವವರು ಕಡೆಯಿಲ್ಲ ||೩||

ನಾಗಶಯನನ ಮನೆಬಾಗಿಲು ಮುಂದೆ
ಸೋಂಗ್ಹಾಕಿ ನಿಂತ ಕೆಲವರು
ಸೋಂಗ್ಹಾಕಿ ನಿಂತ ಕೆಲವರು ಸಭೆಯೊಳು
ಹೋಗಬೇಕೆಂಬೋ ಭರದಿಂದ ||೪||

ದಾಸರು ಬಗೆಬಗೆ ಸೊಸಿಲೆ ತಳವೂರಿ
ಶ್ರೀಶ ರಾಮೇಶನ ಅರಮನೆ ಮುಂದೆ
ಶ್ರೀಶ ರಾಮೇಶನ ಅರಮನೆ ಮುಂದಿನ್ನು
ಕೂಸೆತ್ತಿಕೊಂಡು ನಿಂತ ಕೆಲವರು ||೫|
*********