ದರುಶನವಾಯಿತು ಪಂಢರೀಶನ ankita gururama vittala

ದರುಶನವಾಯಿತು ಪಂಢರೀಶನ ll ಪ ll

ದರುಶನದಿಂದಲಿ ಧನ್ಯರಾದೆವು

ಸರಸಿಜಭವನ ನಾಭಿಯಲಿ ಪಡೆದವನ ll ಅ ಪ ll

ತಂದೆತಾಯಿಯರ ಭಕ್ತಿಯಿಂದ ಸೇವಿಸುವರಿಗೊಲಿದಾ-

ನಂದಪದವಿಯನಿತ್ತ ನಂದನ ಕಂದನ ll 1 ll

ಇಷ್ಟ ಭಕುತ ಕೊಟ್ಟ ಇಟ್ಟಿಗೆ ಮೇಲೆ ನೆಲಸಿ

ಶಿಷ್ಟರ ಸಲಹುವ ವಿಟ್ಟಠಲರಾಯನಂಘ್ರಿ ll 2 ll

ಉರದಲಿ ಸಿರಿಯನು ಧರಿಸಿ ಸುರರ ಕಾರ್ಯ

ನೆರವೇರಿಸುವ ಜಗದ್ಭರಿತನ ಶ್ರೀಪಾದ ll 3 ll

ಭಾಗವತರ ಭವರೋಗಗಳ ಕಳೆವ

ನಾಗಶಯನ ನಿಖಿಲಾಗಮವೇದ್ಯನ ll 4 ll

ರುಕುಮಾಬಾಯಿಗೆ ಸುಖವ ಕರುಣಿಸಿದ

ಮುಕುತಿದಾಯಕ ಗುರುರಾಮವಿಟ್ಠಲ ಚರಣ ll 5 ll

***